”میں صرف اس لیے شادی نہیں کرنا چاہتی کہ ایک عمر کے بعد سب یہی توقع کرتے ہیں۔ میرے نزدیک غلط رشتے میں جانے سے بہتر ہے کہ انسان صحیح شخص کا انتظار کرے۔ اگر زندگی میں شادی نہ بھی ہو تو مجھے اس بات سے کوئی مسئلہ نہیں، کیونکہ میں خود کو ادھورا محسوس نہیں کرتی۔“
بالی ووڈ اداکارہ سارہ علی خان نے حالیہ گفتگو میں رشتوں اور شادی سے متعلق اپنی سوچ کھل کر بیان کرتے ہوئے کہا کہ زندگی میں دیکھے گئے تجربات انسان کی سوچ بدل دیتے ہیں۔ ان کے مطابق انہوں نے اپنے اردگرد کئی ایسے رشتے دیکھے ہیں جو وقت کے ساتھ ٹوٹ گئے، اسی لیے وہ صرف کسی ساتھی کی خاطر جلد بازی میں فیصلہ کرنے پر یقین نہیں رکھتیں۔
اداکارہ کا کہنا تھا کہ ہر انسان کو پہلے خود کے ساتھ مطمئن ہونا چاہیے۔ انہوں نے واضح کیا کہ وہ کسی ایسے شخص کی تلاش میں نہیں ہیں جو ان کی زندگی کو مکمل کرے، کیونکہ ان کے نزدیک انسان کی اپنی پہچان اور ذہنی سکون سب سے زیادہ اہم ہوتا ہے۔
سارہ علی خان نے یہ بھی کہا کہ معاشرے میں اکثر شادی کو ایک لازمی منزل سمجھ لیا جاتا ہے، لیکن ہر شخص کی زندگی اور ترجیحات مختلف ہوتی ہیں۔ ان کے مطابق صحیح وقت اور صحیح انسان کا انتخاب ہی رشتے کو مضبوط بناتا ہے، ورنہ صرف سماجی دباؤ میں کیا گیا فیصلہ بعد میں مشکلات پیدا کر سکتا ہے۔
واضح رہے کہ سیف علی خان اور امریتا سنگھ کی شادی بھی ماضی میں کافی توجہ کا مرکز رہی تھی۔ دونوں نے 1991 میں شادی کی تھی، تاہم کئی برس ساتھ رہنے کے بعد 2004 میں ان کی راہیں جدا ہوگئیں۔ بعد ازاں سیف علی خان نے کرینہ کپور سے دوسری شادی کر لی، جبکہ امریتا سنگھ نے دوبارہ شادی نہیں کی۔