ایپکس کمیٹی کا اجلاس، بلوچستان میں سیکیورٹی وترقیاتی اقدامات پر وزیراعظم کو بریفنگ

وزیراعظم پاکستان محمد شہباز شریف کی زیر صدارت بلوچستان میں نیشنل ایکشن پلان کی صوبائی ایپکس کمیٹی کا اجلاس منعقد ہوا، جس میں صوبے کی سیکیورٹی صورتحال، ترقیاتی منصوبوں اور گورننس کے امور کا تفصیلی جائزہ لیا گیا۔

اجلاس میں وزیراعظم کو بلوچستان میں سیکیورٹی اقدامات، انسدادِ دہشت گردی کی پیشرفت، ترقیاتی منصوبوں اور انتظامی اصلاحات پر بریفنگ دی گئی۔ حکام نے بتایا کہ دہشت گردی کے مکمل خاتمے کے لیے تمام ادارے بھرپور انداز میں متحرک ہیں۔

اجلاس میں وزیراعظم نے بلوچستان کے رخشان ڈویژن میں فرنٹیئر کور کی تعیناتی کی ہدایت کی، جس کا مقصد معدنی وسائل کے تحفظ کے لیے ایک مربوط سیکیورٹی راہداری قائم کرنا ہے۔ اس منصوبے میں اضافی یونٹس، شاہراہوں پر چیک پوسٹس، سرویلنس نظام اور سرحدی پوسٹس شامل ہوں گی۔

وزیراعظم نے کہا کہ بلوچستان معدنی وسائل سے مالا مال خطہ ہے اور وہاں محفوظ ماحول کی فراہمی ملکی و غیر ملکی سرمایہ کاری کے لیے انتہائی ضروری ہے۔

اجلاس کو بریفنگ میں بتایا گیا کہ بلوچستان میں گورننس کی بہتری، ڈیجیٹائزیشن، کیش لیس اکانومی اور دیگر اصلاحات پر بھی پیش رفت جاری ہے۔ حکام نے بتایا کہ صوبے میں نومبر 2024 سے اب تک کوئی پولیو کیس رپورٹ نہیں ہوا، جبکہ صحت کے متعدد منصوبے فعال ہوچکے ہیں۔

مزید بتایا گیا کہ بلوچستان میں 99 فیصد اسکول فعال ہیں، جبکہ شمسی توانائی کے منصوبے کے تحت 15 ہزار سے زائد گھر مستفید ہو رہے ہیں، جس سے اربوں روپے کی بچت بھی ہوئی ہے۔

وزیراعظم نے بلوچستان میں نوجوانوں کی فلاح و بہبود، روزگار کے مواقع، فنی تربیت، اسکالرشپس اور ڈیجیٹل اسکلز پروگرامز کو حکومت کی ترجیح قرار دیا۔

اجلاس میں وفاقی وزراء، اعلیٰ عسکری و سول حکام سمیت مختلف اداروں کے نمائندگان نے شرکت کی۔