پاکستان ہاکی فیڈریشن کی خصوصی درخواست پر حکومتِ پنجاب اور اسپورٹس بورڈ پنجاب نے نیشنل ہاکی اسٹیڈیم لاہور اور اس سے ملحقہ پریکٹس پچ کی مکمل تجدید اور اپ گریڈیشن کے لیے 400 ملین (40 کروڑ) روپے کے فنڈز کی منظوری دے دی ہے۔
اس منصوبے کے تحت کھلاڑیوں کو بین الاقوامی معیار کی سہولیات کی فراہمی کے لیے اسٹیڈیم میں نئی ایسٹرو ٹرف بچھائی جائے گی، جبکہ اسٹیڈیم کے بنیادی ڈھانچے کی مرمت، تجدید اور جدید ترین سہولیات کی فراہمی کو یقینی بنایا جائے گا تاکہ کھلاڑیوں کی بہتر انداز میں ٹریننگ ممکن ہو سکے۔
حکام کے مطابق لاہور ہاکی اسٹیڈیم کی اپ گریڈیشن کا یہ منصوبہ جنوری 2027 تک مکمل ہونے کی توقع ہے۔ اس پیش رفت کا بنیادی مقصد قومی کھیل ہاکی کی بحالی، اس کی بنیادوں کو مضبوط بنانا اور کھلاڑیوں کو بین الاقوامی معیار کے موافق ماحول فراہم کرنا ہے۔