تین ملکی ون ڈے سیریز کے چھٹے اور آخری لیگ میچ میں انگلینڈ نے سری لنکا کو 55 رنز سے شکست دے دی۔ لاہور کے قذافی اسٹیڈیم میں کھیلے گئے میچ میں انگلینڈ نے پہلے بیٹنگ کرتے ہوئے مقررہ 50 اوورز میں 386 رنز بنائے۔
انگلینڈ کی جانب سے بین ڈکٹ نے 167 رنز کی شاندار اننگز کھیلی جبکہ ٹام بیٹن 74 رنز بناکر نمایاں رہے۔
387 رنز کے ہدف کے تعاقب میں سری لنکن ٹیم 331 رنز پر آل آؤٹ ہوگئی۔ پوون رتنائیکے نے 118 اور کپتان کوشل مینڈس نے 89 رنز بنائے تاہم ٹیم کو کامیابی نہ دلا سکے۔ انگلینڈ کے لیام ڈاسن نے 4 وکٹیں حاصل کیں۔
واضح رہے کہ انگلینڈ پہلے ہی فائنل کی دوڑ سے باہر ہوچکا تھا، جبکہ تین ملکی سیریز کا فائنل ہفتے کو پاکستان اور سری لنکا کے درمیان کھیلا جائے گا۔