قومی کرکٹ ٹیم کے وکٹ کیپر بیٹر محمد رضوان نے نوجوان بیٹر معاذ صداقت کی کامیابی پر خوشی کا اظہار کرتے ہوئے ان سے اپنی پہلی ملاقات کا ذکر کیا ہے۔
محمد رضوان کا کہنا ہے کہ ایسا لگتا ہے جیسے یہ کل کی بات ہو، جب پشاور میں ان کے گھر ایک لڑکا ان سے ملنے آیا تھا۔ وہ نوجوان اپنے بھائی ہارون کے ساتھ آیا تھا اور پاکستان کے لیے کرکٹ کھیلنا اس کا خواب تھا۔
رضوان کے مطابق اس نوجوان کی آنکھوں میں بہت سی امیدیں اور دل میں عزم تھا۔ آج اسی بچے معاذ صداقت کو پاکستان کی شرٹ پہنے دیکھ کر انہیں بے حد خوشی ہوئی ہے۔
انہوں نے امید ظاہر کی کہ معاذ کا یہ سفر ایک خوبصورت آغاز ثابت ہوگا۔ محمد رضوان نے پیغام دیا کہ پاکستان کی شرٹ پہننے کا خواب ہو یا زندگی میں کوئی اور منزل حاصل کرنا، محنت، صبر اور اللہ پر یقین برقرار رکھنا چاہیے۔
محمد رضوان نے صاحبزادہ فرحان اور قومی ٹیم کو ہوم سیریز جیتنے پر مبارکباد بھی دی اور اپنے پیغام کا اختتام ’’پاکستان زندہ باد‘‘ کے نعرے سے کیا۔