نیوزی لینڈ کے سابق کپتان کین ولیمسن نے انکشاف کیا ہے کہ بھارتی اسٹار بیٹر ویرات کوہلی کے ساتھ ریٹائرمنٹ سے قبل ہونے والی ایک دلچسپ گفتگو نے انہیں اپنے کیریئر اور زندگی کے بارے میں سوچنے پر مجبور کر دیا تھا۔
کین ولیمسن کے مطابق ایک پوڈ کاسٹ میں گفتگو کے دوران انہوں نے بتایا کہ ان کے اور ویرات کوہلی کے درمیان کرکٹ، کیریئر کے اختتام اور ذاتی تجربات پر تفصیلی تبادلۂ خیال ہوا تھا۔ دونوں کھلاڑیوں کے درمیان طویل انٹرنیشنل کیریئر، کپتانی کی ذمے داریوں اور ایک ہی دور میں خاندانی زندگی کے آغاز جیسی کئی باتیں مشترک رہی ہیں، اور دونوں نے تقریباً 16 سال تک مسلسل بہتری کے لیے محنت کی۔
ولیمسن نے بتایا کہ کوہلی سے فون پر بات کرنے کے بعد ہی انہوں نے اپنی اہلیہ سے ریٹائرمنٹ کے فیصلے کا ذکر کیا۔ 16 سالہ انٹرنیشنل کیریئر کا اختتام کرنے والے کین ولیمسن نے ٹیسٹ کرکٹ میں 9,515 رنز بنائے جبکہ ویرات کوہلی 9,230 رنز کے بعد اس فارمیٹ سے ریٹائر ہوئے۔
اس حوالے سے ولیمسن کا کہنا تھا کہ ان کے لیے کامیابی کا معیار صرف رنز یا سنچریاں نہیں بلکہ کھیل سے حقیقی وابستگی اور ٹیم کے لیے مثبت کردار ادا کرنا تھا۔