مستونگ کے علاقے کنڈاوا میں گزشتہ روز فرنٹیئر کور کی ایک چوکی پر ہونے والے خودکش کار بم حملے کے نتیجے میں پاکستانی حکام کے مطابق تین عسکریت پسند اور دو شہری ہلاک جبکہ 13 افراد زخمی ہوگئے، اس دھماکے سے قریبی گھروں اور ایک مسجد کو بھی نقصان پہنچا۔
کالعدم تنظیم بلوچ لبریشن آرمی نے حملے کی ذمہ داری قبول کرتے ہوئے حملہ آور کی شناخت اسامہ شاہوانی کے نام سے ظاہر کی اور دعویٰ کیا کہ وہ 2022 میں ان کی تنظیم میں شامل ہوا تھا۔
تاہم سوشل میڈیا پر اس سے قبل اسے سیکیورٹی فورسز کی جانب سے 2024 میں جبری طور پر لاپتا کیا گیا شخص قرار دیا گیا تھا، جس سے متعلق پوسٹ بعدازاں حذف کردی گئی۔
فاطمہ گل سمیت دیگر صارفین نے ان تاریخوں کے تضاد کی نشاندہی کرتے ہوئے جبری بھرتیوں کے حوالے سے سوالات اٹھائے ہیں، جبکہ حملے کے بعد علاقے میں سیکیورٹی فورسز کا آپریشن جاری ہے۔