سوشل میڈیا پر قرآنی وظائف اور موکل فراہم کرنے کا جھانسہ دے کر خاتون سے 25 لاکھ روپے ہتھیانے والی جعلی پیرنی کے خلاف این سی سی آئی اے کراچی زون نے کارروائی کرتے ہوئے رقم ریکور کروا دی۔
ترجمان این سی سی آئی اے کے مطابق متاثرہ خاتون سیدہ ارجمند نے شکایت درج کروائی تھی کہ سوشل میڈیا پر ’’قرآنی وظائف‘‘ نامی پیج چلانے والی خاتون نے پریشانیاں دور کرنے، وظائف بتانے اور دو موکل فراہم کرنے کے نام پر ان سے رقم وصول کی۔
متاثرہ خاتون نے نومبر 2025 میں مختلف بینک اکاؤنٹس میں مجموعی طور پر 25 لاکھ روپے منتقل کیے، تاہم بعد میں انہیں فراڈ کا علم ہوا۔
این سی سی آئی اے کراچی زون نے شکایت پر تحقیقات شروع کیں اور کارروائی کے نتیجے میں متاثرہ خاتون کے تمام 25 لاکھ روپے واپس ریکور کروا دیے۔
این سی سی آئی اے نے شہریوں کو سوشل میڈیا پر جعلی پیروں، عاملوں اور روحانی علاج کے نام پر رقم بٹورنے والے عناصر سے محتاط رہنے کی ہدایت کی ہے۔