’’کون کہتا ہے کہ کراچی لڑکیوں کے لیے محفوظ نہیں ہے؟ کراچی بہت محفوظ شہر ہے اور میں اس وقت رات کے تقریباً 2 بج کر 15 منٹ پر اکیلی واک کر رہی ہوں۔ گھر میں بیٹھے بیٹھے دل گھبرا رہا تھا تو سوچا باہر نکل آؤں۔ اب میں واپس گھر جا رہی ہوں اور بالکل محفوظ ہوں۔‘‘
یہ کہنا ہے پاکستانی اداکارہ فائزہ خان کا جنہوں نے ساتھی اداکارہ حنا الطاف کے کراچی سے متعلق بیان کا جواب دینے کے لیے رات گئے شہر کی سڑک پر چہل قدمی کرتے ہوئے اپنی ویڈیو سوشل میڈیا پر شیئر کر دی۔
دراصل یہ بحث اس وقت شروع ہوئی جب حنا الطاف نے لندن سے کراچی واپسی کے موقع پر شہر کو جیل سے تشبیہ دی اور خواتین کے تحفظ سے متعلق خدشات کا اظہار کیا۔ ان کے اس بیان پر شوبز شخصیات کی جانب سے مختلف ردعمل سامنے آ رہے ہیں۔
فائزہ خان نے حنا کی رائے سے اختلاف کرتے ہوئے اپنے ذاتی تجربے کی مثال دی۔ انہوں نے رات کے وقت گھر سے باہر نکل کر یہ پیغام دینے کی کوشش کی کہ کراچی میں خواتین خود کو محفوظ محسوس کر سکتی ہیں۔
اس سے قبل اداکارہ ایمن خان نے بھی حنا الطاف کے بیان پر ردعمل دیتے ہوئے کہا تھا کہ خواتین اب پہلے سے زیادہ بااختیار ہو رہی ہیں اور انہیں خود کبھی اس نوعیت کا تجربہ نہیں ہوا۔ تاہم انہوں نے یہ امکان بھی ظاہر کیا کہ حنا کی رائے ان کے کسی ذاتی تجربے کی بنیاد پر ہو سکتی ہے۔
اداکار منیب بٹ نے بھی حنا کے مؤقف سے اختلاف کرتے ہوئے کہا کہ سندھ میں حالات پہلے کے مقابلے میں کافی بہتر ہو چکے ہیں۔
کراچی میں خواتین کے تحفظ سے متعلق شوبز شخصیات کے مختلف بیانات نے ایک نئی بحث چھیڑ دی ہے۔ تاہم ایک شخص کا رات گئے محفوظ طریقے سے گھر واپس پہنچنا پورے شہر کی سیکیورٹی صورتحال کا حتمی ثبوت نہیں، کیونکہ ہر خاتون کا تجربہ مختلف ہو سکتا ہے۔