’’بات کرنے کی تمیز نہیں، ساتھ کام کرنا خوفناک تجربہ رہا‘‘ دیا مرزا کی نوازالدین صدیقی پر تنقید، حقیقت کیا ہے؟

image

بالی ووڈ اداکارہ دیا مرزا کی جانب سے معروف اداکار نوازالدین صدیقی کے بارے میں کی گئی ایک غیر متوقع پوسٹ نے سوشل میڈیا پر نئی بحث چھیڑ دی ہے۔ اداکارہ کے سخت الفاظ اور نوازالدین کے جواب نے مداحوں کو حیران کردیا، تاہم کئی صارفین اسے دونوں فنکاروں کے نئے پراجیکٹ کی تشہیر قرار دے رہے ہیں۔

دیا مرزا نے حال ہی میں انسٹاگرام پر نوازالدین صدیقی کو ٹیگ کرتے ہوئے ان کے ساتھ کام کرنے کے تجربے کو انتہائی ناخوشگوار قرار دیا۔ اداکارہ نے اپنی پوسٹ میں لکھا کہ ان کے ساتھ کام کرنا خوفناک تجربہ رہا، انہیں بات کرنے کی تمیز نہیں اور ان کا رویہ حد سے زیادہ جارحانہ ہے۔

دلچسپ بات یہ ہے کہ دیا مرزا نے اپنے بیان میں کسی مخصوص واقعے کا ذکر نہیں کیا اور نہ ہی یہ واضح کیا کہ انہیں نوازالدین کے رویے سے کیا شکایت پیش آئی تھی۔

دوسری جانب نوازالدین صدیقی بھی خاموش نہ رہے اور انہوں نے جواب دیتے ہوئے لکھا، ’’رویے میں خامیاں نکالنا آسان ہے، کام میں خامی نکال کر دکھائیے۔‘‘

دونوں اداکاروں کے درمیان اس غیر معمولی تبادلۂ خیال نے مداحوں کو الجھن میں ڈال دیا۔ بعض صارفین نے اسے حقیقی اختلاف سمجھا، جبکہ دیگر نے خدشہ ظاہر کیا کہ یہ سب آنے والے پراجیکٹ کے لیے لوگوں کی توجہ حاصل کرنے کی کوشش ہوسکتی ہے۔

میڈیا رپورٹس کے مطابق دیا مرزا اور نوازالدین صدیقی جلد ہی ایک نئے پراجیکٹ ’ڈاکٹر حسن‘ میں ایک ساتھ نظر آئیں گے۔ اسی وجہ سے سوشل میڈیا پر قیاس آرائیاں کی جارہی ہیں کہ دونوں کی متنازع پوسٹس دراصل اس پراجیکٹ کی تشہیری مہم کا حصہ ہوسکتی ہیں۔

ایک صارف نے اس انداز پر تنقید کرتے ہوئے لکھا، ’’اگر آپ اپنے آنے والے پراجیکٹ کی تشہیر کے لیے ایسے طریقے اختیار کر رہے ہیں تو براہِ کرم ایسا نہ کریں، یہ انتہائی افسوسناک ہے۔‘‘

فی الحال دونوں اداکاروں کی جانب سے یہ واضح نہیں کیا گیا کہ ان کے درمیان واقعی کوئی اختلاف موجود ہے یا یہ محض تشہیر کا منفرد انداز ہے۔ تاہم ان پوسٹس نے سوشل میڈیا پر خاصی توجہ حاصل کرلی ہے۔


Meta Urdu News: This news section is a part of the largest Urdu News aggregator that provides access to over 15 leading sources of Urdu News and search facility of archived news since 2008.

Follow US