روسی صدر ولادیمیر پیوٹن کے دورۂ چین کے دوران ان کے ساتھ موجود ایک خصوصی سیاہ بریف کیس عالمی توجہ کا مرکز بن گیا۔ یہ عام سفری بیگ نہیں بلکہ روس کے جوہری کمانڈ سسٹم سے منسلک اہم مواصلاتی آلہ ہے، جسے صدر کے غیر ملکی دوروں میں بھی ساتھ رکھا جاتا ہے۔
الجزیرہ کی رپورٹ کے مطابق چین کے شہر شینژن میں ایشیا پیسیفک اکنامک کوآپریشن کے سربراہی اجلاس کے موقع پر روسی وفد کے ساتھ موجود ایک صحافی کی نظر فوجی اہلکار کے ہاتھ میں پکڑے سیاہ بریف کیس پر پڑی۔ صحافی نے پوچھا کہ کیا یہ جوہری بریف کیس ہے؟ جس پر اہلکار نے مختصر جواب دیا، ’’جی ہاں، یہی ہے۔‘‘
روسی صدر کے ساتھ موجود اس خصوصی بریف کیس کو ’چیگیٹ‘ کہا جاتا ہے، جو روس کے جوہری ہتھیاروں سے متعلق کمانڈ اینڈ کنٹرول نظام کا حصہ ہے۔ اس میں محفوظ رابطے کے لیے خصوصی آلات نصب ہوتے ہیں، جن کے ذریعے اعلیٰ قیادت اہم فیصلے اور ہدایات فوجی حکام تک پہنچا سکتی ہے۔
تاہم یہ سمجھنا ضروری ہے کہ اس بریف کیس کا مقصد براہِ راست جوہری میزائل داغنا نہیں ہے۔ یہ ایک محفوظ مواصلاتی نظام فراہم کرتا ہے، جس کے ذریعے جوہری ہتھیاروں کے استعمال سے متعلق احکامات متعلقہ فوجی کمانڈ تک منتقل کیے جاسکتے ہیں۔
روسی صدر کے اندرون ملک اور بیرون ملک دوروں کے دوران تربیت یافتہ فوجی اہلکار اس بریف کیس کو اپنے ساتھ رکھتے ہیں تاکہ ضرورت پڑنے پر صدر کو جوہری کمانڈ کے مواصلاتی نظام تک رسائی حاصل ہو۔
اس بریف کیس کی موجودگی ایسے وقت میں سامنے آئی جب 19 نومبر کو چین میں روسی صدر ولادیمیر پیوٹن، امریکی صدر ڈونلڈ ٹرمپ اور چینی صدر شی جن پنگ کے درمیان اہم سہ فریقی ملاقات ہوئی۔
رپورٹ کے مطابق اس ملاقات میں عالمی سلامتی، روس یوکرین جنگ، ایران کی صورتحال، بین الاقوامی تجارت، مصنوعی ذہانت اور جوہری ہتھیاروں سے متعلق معاملات پر بات چیت متوقع تھی۔
کریملن کے ترجمان دمتری پیسکوف نے بھی اجلاس سے قبل بتایا تھا کہ تینوں رہنما موجودہ عالمی حالات، یوکرین کے تنازع اور ممکنہ طور پر ایران سے متعلق پیش رفت پر گفتگو کریں گے، جبکہ دیگر موضوعات کی مکمل تفصیلات سامنے آنا باقی تھیں۔
واضح رہے کہ روسی صدر کے ساتھ چیگیٹ بریف کیس کی موجودگی کوئی غیر معمولی فوجی اقدام نہیں بلکہ طے شدہ سیکیورٹی انتظامات کا حصہ ہے۔ تاہم دنیا کی تین بڑی جوہری طاقتوں کے سربراہان کی ملاقات کے موقع پر اس کی موجودگی نے خاص توجہ حاصل کی۔