دنیا بھر میں کورونا وائرس اور لاک ڈاؤن کے پیش نظر ملازمین اپنے گھروں سے دفتر کے کام کر رہے ہیں اور اس دوران ان کے مختلف قسم کے دلچسپ واقعات بھی رونما ہو رہے ہیں۔
ایسا ہی ایک مزاحیہ واقعہ امریکہ میں پیش آیا جب ایک نوجوان نے عجیب و غریب حرکت کر کے اپنے دفتر کے ساتھیوں کو بیوقوف بنا دیا اور ان کی حیرت پر خوب لطف اندوز بھی ہوتا رہا۔
امریکی ریاست میسا چوسٹس کا رہائشی اینڈریو ایکل ایک سافٹ انجینیئر ہے، ویڈیو کال کے دوران اس نے ایک دلکش اپارٹمنٹ کی تصویر اپنے پیچھے آویزاں کر لی تاکہ اس کے ساتھیوں کو یہ لگے کہ وہ ایک مہنگے اپارٹمنٹ میں رہائش پذیر ہے۔
اینڈریو کے ساتھیوں نے اس کے اپارٹمنٹ کو دیکھ کر خوب حیرانی ظاہر کی اور دریافت کیا کہ وہ اتنا مہنگا اپارٹمنٹ کیسے افورڈ کر سکتا ہے۔
90 منٹ کی کال کے دوران وہ ان کی حیرت سے لطف اندوز ہوتا رہا اور پھر خود ہی سب سچ بتا دیا۔ اس نے حقیقت سے پردہ اٹھاتے ہوئے کہا کہ اس نے اس اپارٹمنٹ کی تصویر کا 6 صفحات کا پرنٹ نکالا اور ٹیپ کی مدد سے جوڑ کر بیک گراؤنڈ میں آویزاں کر دیا۔
اس پرینک کی حقیقت جان کر اینڈریو کے دوست بہت ہنسے جس کے بعد اینڈریو نے سوشل میڈیا پر بھی اس پرینک کے بارے میں پوسٹ کیا جسے لوگوں نے پسند بھی کیا۔