خیبرپختونخوا کی حکومت نے نو مئی کے واقعات کی جوڈیشل انکوائری کے لیے پشاور ہائی کورٹ سے رجوع کر لیا ہے۔ صوبائی حکومت نے چیف جسٹس پشاور ہائی کورٹ کو خط لکھ کر جوڈیشل کمیشن بنانے کی استدعا کی ہے۔
خیبرپختونخوا کے وزیر قانون آفتاب عالم نے اتوار کو میڈیا سے گفتگو میں بتایا کہ ’نو مئی کے واقعات سے متعلق جوڈیشل کمیشن کے قیام سے متعلق چیف جسٹس کو خط بھیج دیا ہے۔ خط محکمہ انتظامیہ کی جانب سے ارسال کیا گیا ہے۔‘
انہوں نے کہا کہ خط میں 9 مئی کے واقعات سے متعلق جوڈیشل کمیشن کے قیام کی استدعا کی گئی ہے۔ چیف جسٹس اب کمیشن کے لیے ناموں کا اعلان کریں گے۔
صوبائی وزیر قانون آفتاب عالم نے مزید بتایا کہ جوڈیشل کمیشن کے سربراہ پشاور ہائی کورٹ کے جج ہوں گے۔
یاد رہے کہ 27 جون کو خیبرپختونخوا حکومت نے 9 مئی واقعات کی تحقیقات کے لیے صوبائی کابینہ کے اجلاس میں جوڈیشل کمیشن کے قیام کی منظوری دی تھی۔
صوبائی کابینہ کے فیصلے کے مطابق ’کمیشن کو 9 مئی کی مکمل تحقیقات کرنے کی ذمہ داری سونپی جائے گی، تحقیقات کے بعد 9 مئی 2023 کے واقعات میں ملوث تمام کرداروں کو بے نقاب کیا جائے گا۔‘
واضح رہے کہ 9 مئی 2023 کو القادر ٹرسٹ کیس میں سابق وزیراعظم عمران خان کی اسلام آباد ہائی کورٹ کے احاطے سے گرفتاری کے بعد پی ٹی آئی کی طرف سے ملک گیر احتجاج کیا گیا تھا جس کے دوران فوجی، سول اور نجی تنصیبات کو نذر آتش کیا گیا، سرکاری و نجی املاک کو شدید نقصان پہنچایا گیا تھا۔