مونا رانی داس میں ’سیٹس انورسس‘ کی بھی تشخیص ہوئی۔ یہ وہ غیر معمولی حالت ہے جس میں اہم اعضا اپنی نارمل جگہ پر نہیں بلکہ ریورس پوزیشن پر ہوتے ہیں۔ ان کے جگر، پھیپھڑوں، تلی اور معدے کو دائیں جانب ہونا چاہیے تھا مگر وہ بائیں جانب تھے۔ یہ انسانی جسم میں ’ہیومن اناٹومی‘ کے اصولوں کے برخلاف تھا۔
داس میں ڈیکسٹرو کارڈیا کی تشخیص ہوئی تھی جس میں کسی کا دل چھاتی میں بائیں جانب ہونے کی بجائے دائیں جانب ہوتا ہےبنگلہ دیش کی مونا رانی داس کو دو سال قبل چھاتی کے دائیں جانب درد ہونا شروع ہوئی۔ خاندان والوں کو لگا کہ شاید انھیں تیزابیت یا ’ہارٹ برن‘ کی شکایت ہو گی۔
کسی کو یہ معلوم نہیں تھا کہ 52 سالہ خاتون ایک غیر معمولی بیماری سے متاثرہ ہیں جس کے باعث انھیں علاج کی غرض سے انڈیا جانا پڑے گا۔
بی بی سی بنگلہ کو دیے انٹرویو میں داس بتاتی ہیں کہ یہ علامات کیسے رونما ہوئیں۔
وہ کہتی ہیں کہ ’چھاتی کے دائیں جانب کچھ روز تک تکلیف کے بعد میرے لیے سانس لینا بھی مشکل ہوگیا تھا۔‘ کچھ دن بعد انھیں دل کا دورہ پڑا۔ علاج کے دوران ڈاکٹروں کو احساس ہوا کہ مسئلہ یہ ہے کہ ان کا دل وہاں نہیں جہاں اسے ہونا چاہیے تھا۔
داس کہتی ہیں کہ ’ڈاکٹروں کو معلوم ہوا کہ میرا دل چھاتی کی دائیں جانب تھا۔‘
جنوب مغربی بنگلہ دیش میں واقع ان کے آبائی شہر ساتکھیرا کے ڈاکٹروں نے ان میں ’ڈیکسٹرو کارڈیا‘ کی تشخیص تھی جس میں دل چھاتی کے بائیں جانب ہونے کی بجائے دائیں جانب ہوتا ہے۔
اس کے علاوہ داس میں ’سائیٹس انورسس‘ کی بھی تشخیص ہوئی۔ یہ وہ غیر معمولی حالت ہے جس میں اہم اعضا اپنی نارمل جگہ پر نہیں بلکہ ریورس پوزیشن پر ہوتے ہیں۔ ان کے جگر، پھیپھڑوں، تلی اور معدے کو دائیں جانب ہونا چاہیے تھا مگر وہ بائیں جانب تھے۔ یہ انسانی جسم میں ’ہیومن اناٹومی‘ کے اصولوں کے برخلاف تھا۔
مختلف مطالعوں سے یہ معلوم ہوا ہے کہ 12 ہزار بچوں کی پیدائش میں سے ایک بچہ ڈیکسٹرو کارڈیا سے متاثرہ ہوسکتا ہے۔
جب خاندان کو احساس ہوا کہ داس کی حالت میں بہتری نہیں آ رہی تو انھوں نے مشرقی انڈین شہر کلکتہ میں امراض دل کے ماہر ڈاکٹر سے رجوع کا فیصلہ کیا۔
بنگلہ دیش میں کئی شہریوں کو یہ لگتا ہے کہ انڈیا میں بہتر طبی سہولیات ہیں۔ ہر سال علاج کی غرض سے لاکھوں لوگ انڈیا جاتے ہیں۔ داس فیملی نے بھی علاج کے لیے انڈیا جانے کی ٹھانی۔
منیپال ہسپتال بروڈوے کے ڈاکٹر سدھارت مکھرجی نے ان کا معائنہ کیا۔ انھوں نے مئی 2024 میں داس کا آپریشن کیا گیا۔
مکھرجی نے کہا کہ ’ڈیکسٹرو کارڈیا کے مریضوں کا آپریشن بہت مشکل ہوتا ہے۔ ہم خود اکثر دائیں ہاتھ کا استعمال کرتے ہیں اور ہمیں عموماً مریض کے بھی دائیں طرف ہی آپریشن کرنا ہوتا ہے۔‘
’اس کیس میں ہمیں مریض کے بائیں طرف آپریشن کرنا تھا۔ یہ کچھ حد تک نیا تجربہ تھا لیکن ہماری پوری ٹیم نے صورتحال کے مطابق خود کو ڈھال لیا تھا۔‘
یہ آپریشن کامیاب رہا اور اب داس واپس اپنے گھر بنگلہ دیش جا رہی ہیں۔ تاہم انھیں جلد ہی چیک اپ کے لیے انڈیا واپس آنا پڑے گا۔
دل کی پوزیشن میں تبدیلی
حال ہی میں ایک اور غیر معمولی طبی کیس انڈیا میں میڈیا کی توجہ حاصل کر رہا ہے۔ پیدائش کے وقت ایک انڈین مرد کا دل بائیں جانب تھا مگر وقت کے ساتھ اور طویل عرصے تک کھانسی کے دوران اس نے اپنی پوزیشن تبدیل کی۔
مغربی بنگال کے رہائشی 66 سالہ رضا الکریم کو بچپن سے سانس لینے میں دشواری رہتی تھی۔ وہ بی بی سی بنگلہ کو بتاتے ہیں کہ ’میں بچپن میں کھیلوں میں حصہ لیتا تھا لیکن بعض اوقات مجھے سانس نہیں آتا تھا اور بہت کھانسی ہوتی تھی۔‘
’بعد میں، میں نے قریب 25 سال قریب تک سیاست میں حصہ لیا۔ میں ادھر ادھر جاتا رہتا تھا۔ میں نے مقامی ڈاکٹر سے معائنہ کروایا اور وہ مجھے باقاعدگی سے دوا دیتے رہتے تھے۔‘
لیکن کچھ سال قبل کریم کو کمزوری ہونے لگی۔ ان کی پریشان حال بیٹی انھیں کلکتہ میں میڈیکا سپر سپیشلٹی ہسپتال میں ایک ڈاکٹر کو دکھانے لے آئیں۔
رضا الکریم کا دل بچپن میں تپ دق کے بعد بائیں سے دائیں جانب آگیا تھاکریم کہتے ہیں کہ ’سانس لینے میں دشواری اس قدر بڑھ گئی تھی کہ نماز ادا کرتے وقت کھڑا ہونا مشکل تھا۔ میں نماز کے دوران دو، تین بار بے ہوش ہوا۔‘
ڈاکٹروں کو معلوم ہوا کہ بچپن میں وہ تپ دق کی بیماری میں مبتلا ہوئے تھے جس کے بعد ان کا دل بائیں جانب سے دائیں جانب آ گیا تھا۔ ڈاکٹروں نے ان کے دل کو فعال رکھنے اور سانس کا مسئلہ ختم کرنے کے لیے پیس میکر لگانے کا فیصلہ کیا۔
جون میں کریم اور ان کے خاندان کو بغیر مزید معلومات دیے ’فوری آپریشن‘ کا کہا گیا۔ پیس میکر لگانے کی تین گھنٹے طویل سرجری کے بعد انھیں اس غیر معمولی آپریشن کے بارے میں بتایا گیا۔
پیس میکر ایک چھوٹی الیکٹرانک ڈیوائس کو کہتے ہیں جو جسم میں اس لیے نصب کی جاتی ہے تاکہ دل کی دھڑکن کی نگرانی ہوسکے۔ یہ ڈیوائس یقینی بناتی ہے کہ کہیں دل کی دھڑکن آہستہ نہ ہوجائے جو کسی مریض کے لیے بہت خطرناک ہوتا ہے۔
کریم کی سرجری غیر معمولی تھی کیونکہ پیس میکر اکثر بائیں جانب موجود دل پر نصب کیا جاتا ہےکریم کا آپریشن کرنے والے ڈاکٹر دلیپ کمار کہتے ہیں کہ یہ سرجری بہت غیر معمولی تھی کیونکہ پیس میکر اکثر بائیں جانب موجود دلوں میں نصب کیے جاتے ہیں۔
وہ کہتے ہیں کہ طبی ٹیم نے کنڈکشن سسٹم پیسنگ (سی ایس پی) کا طریقہ کار استعمال کیا جو کہ کبھی بھی دائیں جانب موجود دل کے لیے نہیں کیا گیا۔
برٹس کارڈیئک سوسائٹی کے مطابق سی ایس پی پیسنگ کا ایک غیر معمولی طریقہ جس میں دل کی دھڑکن کے اپنے نظام کی مدد سے اس کی سرگرمیوں کو فعال رکھا جاتا ہے۔
آسان لفظوں میں یہ کہ سی ایس پی کے ذریعے ایک پیس میکر ڈیوائس دل کی دھڑکن کو رواں اور معمول کے مطابق رکھتی ہے۔
سرجری کے بعد سے کریم کی صحت بہتر ہے اور جلد ان کا دوبارہ معائنہ کیا جائے گا۔ ڈاکٹروں کے مطابق ان انھیں سانس لینے میں دشواری نہیں ہوتی اور وہ بغیر بے ہوشش ہوئے اطمینان سے نماز ادا کر سکتے ہیں۔
