ٹیکنالوجی کی دنیا میں روز بروز حیرت انگیز ایجادات ہو رہی ہیں، اور سام سنگ نے اس دوڑ میں سب کو پیچھے چھوڑتے ہوئے ایک ایسا اسمارٹ فریج متعارف کرایا ہے جو کچن کی روایتی مشکلات کو حل کرنے کے لیے اے آئی ٹیکنالوجی سے لیس ہے۔ یہ فریج نہ صرف آپ کے کھانے پینے کی اشیا کی حفاظت کرے گا بلکہ آپ کے روزمرہ کے معمولات کو آسان بنانے میں بھی مدد دے گا۔
عام طور پر گھروں میں فریج کھانے پینے کی اشیا سے بھرا ہوتا ہے، لیکن مسئلہ اس وقت پیدا ہوتا ہے جب مہمان اچانک آجائیں اور آپ فریج کھول کر دیکھیں تو معلوم ہو کہ ضروری چیزیں ختم ہو چکی ہیں۔ سام سنگ نے اس مسئلے کا حل نکالتے ہوئے ایسا اسمارٹ فریج پیش کیا ہے جو خود بخود آپ کی اشیا کی نگرانی کرے گا اور ان کے ختم ہونے سے پہلے آپ کو خبردار کرے گا۔
سام سنگ کے اس جدید فریج کی سب سے دلچسپ خصوصیت یہ ہے کہ یہ انسٹاکارٹ ایپ کے ساتھ جڑا ہوا ہے۔ جب آپ کوئی بھی شے فریج میں رکھیں گے، تو وہ خودکار طور پر ایپ میں شامل ہو جائے گی۔ اگر کوئی چیز ختم ہونے لگے تو فریج آپ کو خریداری کی فہرست بھیج دے گا تاکہ آپ بروقت شاپنگ کر سکیں اور مہمانوں کے سامنے شرمندگی سے بچ سکیں۔
اس اسمارٹ فریج کا بیسپوک ماڈل 32 انچ کی بڑی اسکرین کے ساتھ پیش کیا جا رہا ہے جو نہ صرف تکنیکی لحاظ سے جدید ہے بلکہ کچن کی خوبصورتی میں بھی اضافہ کرے گا۔ سام سنگ اس فریج کو کنزیومر الیکٹرانکس شو (CES) میں اس ماہ پیش کرے گا، اور یہ جدید ٹیکنالوجی کے شوقین افراد کے لیے ایک بڑی خوشخبری ہے۔
سام سنگ کے اس حیرت انگیز فریج نے یہ ثابت کر دیا ہے کہ مستقبل کی ٹیکنالوجی اب ہماری زندگیوں کا حصہ بن چکی ہے۔ یہ صرف ایک فریج نہیں، بلکہ کچن میں آپ کا ذہین ساتھی بننے والا ہے۔ اب وقت آگیا ہے کہ آپ بھی اپنے کچن کو اسمارٹ بنائیں اور زندگی کو مزید آسان اور خوشگوار بنائیں!