پیریڈز کا وقت پر آنا اور درست طریقے سے آنا صحت مندی کی دلیل ہوتی ہے مگر ان میں ہونے والی بے قاعدگی خواتین کی آئندہ زندگی میں مشکلات کا سبب ہو سکتی ہے اور کئی بڑی بیماریوں کا سبب بھی بن سکتی ہے- ہمارے معاشرے میں لڑکیوں کو ماہواری کے حوالے سے کسی بھی مسئلے کے لیے شادی سے قبل ڈاکٹر کو دکھانا معیوب تصور کیا جاتا ہے- یہی وجہ ہے کہ لڑکیوں کے ان مسائل کا جب شادی کے بعد پتہ چلتا ہے تو وہ دیر ہو جانے کے سبب بڑے مسائل میں تبدیل ہو چکے ہوتے ہیں اور بعض اوقات بانجھ پن، رسولی اور کینسر جیسے جان لیوا امراض میں تبدیل ہو چکے ہوتے ہیں انہی مسائل کے حوالے سے کچھ علامات کے بارے میں ہم آپ کو آج بتائيں گے-
شدید درد کی وجوہات:
عام طور پر ہر عورت کو اپنی زںدگی میں اس درد کا سامنا تقریبا ہر مہینے کرنا پڑتا ہے یہ درد پیٹ کے نچلے حصے کی جانب ہوتا ہے- اس کے علاوہ کمر اور ٹانگوں تک جاتا ہے قابل برداشت حد میں یہ درد نارمل ہوتا ہے اور درحقیقت ماہواری کے دنوں میں ایک خاص ہارمون کے سبب ہوتا ہے- مگر بعض اوقات یہ درد شدت اختیار کر لیتا ہے اور بعض لوگوں میں یہ درد ناقابل برداشت حد تک ہوتا ہے۔ اسکی وجوہات مندرجہ ذیل ہیں
۔ بڑی عمر
۔ زیادہ کثرت سے بچے کو جنم دینا
۔ پیدائش پر قابو پانے والی گولیوں کا استعمال
۔ خون کا بہاؤ زیادہ ہونا
۔ ماہواری کے درد کی خاندانی تاریخ
۔ تمباکو نوشی
۔ غیر مناسب خوراک
۔ موٹاپا
۔ ذہنی دباؤ
شدید درد سے ہونے والی بیماریاں:
۔ اینڈو میٹرس، اس بیماری میں یوٹرس کے اندر اور اووری کے اندر ایسے خلیات بننا اور جمع ہونا شروع ہو جاتے ہیں جو ماہواری کے دنوں میں شدید ترین درد کا باعث بنتے ہیں- یہ ایک خطرناک بیماری ہے اور اگر اس کا علاج بر وقت نہ کیا جائے تو کینسر کا باعث بھی ہو سکتا ہے اس کی علامات میں ماہواری سے قبل اور اس کے دوران شدید ترین درد ہوتا ہے جو کہ ناقابل برداشت ہوتا ہے۔
۔ پی سی اوز، اووری کے اندر کسی قسم کی گُٹلی کی موجودگی بھی شدید ترین ماہواری کے درد کا باعث ہو سکتی ہے یہ گٹلی الٹراساونڈ سے دیکھی جا سکتی ہے اور اس کے علاج کا فیصلہ ڈاکٹر اس کے نوعیت اور سائز کے اعتبار سے کرتے ہیں- بعض اوقات صرف ادویات کے استعمال سے اس کو ختم کیا جا سکتا ہے۔ اس سے اووری مادہ خلیہ بنانے کی صلاحیت کھو بیٹھتی ہے جس کے سبب حمل کے ٹہرنے کے امکانات بہت کم ہو جاتے ہیں-
۔ پیلوس کی سوزش کا مرض، یہ بیماری فیلوپن ٹیوبز سے متعلق ہوتی ہے جس میں اووری اور یوٹرس کے درمیان ٹیوب میں سوزش ہو جاتی ہے اور اووری سے مادہ خلیات کے یوٹرس میں جانے کا راستہ بند ہو جاتا ہے- اس بیماری کے باعث عام طور پر حمل اگر ٹہر بھی جائے تو ٹیوب بند ہونے کے سبب وہ بچے دانی سے باہر کی جانب ہوتا ہے جو بہت خطرناک ہوتا ہے اور اس کے ضائع ہونے کے امکانات بھی بہت زیادہ ہوتے ہیں۔
ماہواری کے اندر کسی بھی قسم کی بے قاعدگی ایک عورت کی ساری زندگی کو برباد بھی کر سکتی ہے اس وجہ سے اس معاملے کی نزاکت کا احساس کرتے ہوۓ کسی بھی قسم کے بے قاعدگی کی صورت میں فوری طور پر ڈاکٹر سے رجوع کرنا آپ کو ایک بڑے خطرے سے محفوظ رکھ سکتا ہے۔