ماں بننے کا احساس جتنا خوبصورت ہوتا ہے اس سے کئی زیادہ ایک ماں کیلیئے امتحان ہوتا ہے، کیونکہ اسے نہ صرف جسمانی تبدیلیوں کا سامنا کرنا پڑتا ہے بلکہ جذباتی اور ذہنی طور پر بھی کافی کچھ برداشت کرنا پڑتا ہے۔ اور ماں بننے کے بعد جو چیز سب سے زیادہ متاثر ہوتی ہے وہ ہے عورت کی ظاہری خوبصورتی۔
تاہم ان میں ایک عام مسئلہ بالوں اور جلد کے مسائل ہیں جس کی وجہ سے اکثر مائیں پریشان رہتی ہیں، حمل کے دوران ہارمونز کی تبدیلیاں بالوں کے گرنے، خشکی اور مہاسوں کا سبب بن سکتی ہیں۔ ایسی صورتحال میں کچھ خواتین تو ڈپریشن میں بھی چلی جاتی ہیں۔
اسی لیے آج ہم آپکو بتائیں گے، بچے کی پیدائش کے بعد مائیں اپنے بالوں اور جلد کا خیال کیسے رکھ سکتی ہیں؟
جلد کے لیئے ابٹن کا استعمال:
ایک مسئلہ جو خواتین کے حمل کے بعد بہت نمایاں طور پر دیکھا جاتا ہے وہ ہے جلد کی رنگت میں تبدیلی۔ تاہم، اسے ابٹن کی مدد سے حل کیا جاسکتا ہے لیکن اس بات کا خاص خیال رکھیں کہ ابٹن کا استعمال کرنے سے قبل یہ ضرور معلوم کرلیں کہ کہیں آپ کو اس سے الرجی تو نہیں۔
تیل کی مالش:
سر پر تیل کی مالش بالوں کی نشوونما کو بہتر بنانے کا ایک بہترین ذریعہ ہے، یہ بالوں کے جھڑنے کو روکنے اور بالوں کی دوبارہ نشوونما میں مدد کرتا ہے۔ اس لیئے بالوں میں تیل کی مالش بہت اہم ہے۔
صحت مند غذا:
صحت مند غذا ہی صحت مند جسم کا راز ہے، یہ بات سب ہی جانتے ہیں لیکن پھر بھی خواتین اپنی غذا اور صحت کا خیال رکھنے میں سستی دکھاتی ہیں، جبکہ تندرست رہنے کے لیے بہترین غذا ایک اہم عنصر ہے۔ خاص طور پر ماں بننے کے بعد اس بات کویقینی بنائیں کہ آپ کی خوراک میں وٹامنز اور غذائی اجزا شامل ہوں جو بنیادی طور پر سبزیوں، اناج اور تازہ پھلوں میں پائے جاتے ہیں اسکے علاوہ ہائیڈریٹ رہنے کے لیے وافر مقدار میں پانی پینا لازمی یاد رکھیں۔یہ غذائیں بالوں کی نشوونما میں اضافے کا سبب بنتی ہیں۔
سپلیمنٹس کا استعمال:
اگر آپ زچگی کے بعد بالوں کے گرنے کے بارے میں فکر مند ہیں تو اپنے ڈاکٹر سے وٹامن یا غذائی سپلیمنٹس لینے کے بارے میں مشورہ بھی کرسکتی ہیں۔
ذہنی تناؤ
ڈپریشن کو کم کرنے کے لیے ہلکی ورزش لازمی کریں، دن میں صرف 15 منٹ یا آدھے گھنٹے کی ورزش سے آپ ذہنی تناؤ کو کم کرسکتی ہیں۔