حضرت انس بن مالک رضی اللہ عنہ سے مروی ہے
کہ میں نے حضور نبی اکرم صلی اللہ علیہ وآلہ وسلم کو فرماتے ہوئے سنا : اﷲ
تعالیٰ نے فرمایا : اے ابن آدم! جب تک تو مجھ سے دعا کرتا رہے گا اور امید
رکھے گا جو کچھ بھی تو کرتا رہے میں تجھے بخشتا رہوں گا اور مجھے کوئی پروا
نہیں۔ اے ابن آدم! اگر تیرے گناہ آسمان کے بادلوں تک پہنچ جائیں پھر بھی تو
بخشش مانگے تو میں بخش دوں گا مجھے کوئی پرواہ نہیں۔ اے ابن آدم! اگر تو
زمین بھر کے برابر گناہ بھی لے کر میرے پاس آئے پھر مجھے اس حالت میں ملے
کہ تو نے میرے ساتھ کسی چیز کو شریک نہ ٹھہرایا ہو تو یقیناً میں زمین بھر
کے برابر تجھے بخشش عطا کروں گا۔
:: ترمذی شریف، کتاب الدعوات عن رسول اﷲ صلي الله عليه وآله وسلم، 5 / 548،
الرقم : 3540
حضرت ابوہریرہ رضی اللہ عنہ سے روایت ہے کہ حضور نبی اکرم صلی اللہ علیہ
وآلہ وسلم نے فرمایا : جسے پسند ہو کہ اللہ تعالیٰ مشکلات اور تکالیف کے
وقت اس کی دعا قبول کرے، وہ خوشحالی کے اوقات میں زیادہ سے زیادہ دعا کیا
کرے۔
:: ترمذی شریف، کتاب الدعوات عن رسول اﷲ صلي الله عليه وآله وسلم، 5 / 462،
الرقم : 3382
حضرت سلمان رضی اللہ عنہ سے روایت ہے کہ حضور نبی اکرم صلی اللہ علیہ وآلہ
وسلم نے فرمایا : دعا کے علاوہ کوئی چیز تقدیر کو ردّ نہیں کر سکتی اور
نیکی کے علاوہ کوئی چیز عمر میں اضافہ نہیں کر سکتی۔
:: ترمذی شریف،کتاب القدر عن رسول اﷲ صلي الله عليه وآله وسلم، 4 / 448،
الرقم : 2139
حضرت نعمان بن بشیر رضی اﷲ عنہما سے روایت ہے کہ حضور نبی اکرم صلی اللہ
علیہ وآلہ وسلم نے فرمایا : دعا عین عبادت ہے پھر آپ صلی اللہ علیہ وآلہ
وسلم نے (بطور دلیل) یہ آیت تلاوت فرمائی : ’’اور تمہارے رب نے فرمایا ہے
تم لوگ مجھ سے دعا کیا کرو میں ضرور قبول کروں گا، بیشک جو لوگ میری بندگی
سے سرکشی کرتے ہیں وہ عنقریب دوزخ میں ذلیل ہو کر داخل ہوں گے۔
:: ترمذی شریف،کتاب التفسير عن رسول اﷲ صلي الله عليه وآله وسلم،5 / 374،
الرقم : 3247
حضرت انس بن مالک رضی اللہ عنہ سے روایت ہے کہ حضور نبی اکرم صلی اللہ علیہ
وآلہ وسلم نے فرمایا : دعا عبادت کا بھی مغز (یعنی خلاصہ اور جوہر) ہے۔
:: ترمذی شریف، کتاب الدعوات عن رسول اﷲ صلي الله عليه وآله وسلم، 5 / 456،
الرقم : 3371 |