میں ریما سے چھوٹی ہوں۔۔۔لالی موڈ کی وہ اداکارائیں جو اپنی عمر چھپاتی ہیں

یہ سچ ہے کہ ہر عورت اپنی بڑھتی عمر کو ظاہر کرنے سے گھبراتی ہے۔۔۔لیکن اب اس سچ سے نظریں کیسے چرائیں کہ جب دنیا کو سچ پتہ ہو لیکن پھر بھی جھوٹ کو دوست بنائیں۔۔۔عمر اگر چھپانا بھی ہے تو ایسے چھپائیں کہ لوگ مذاق نا بنائیں۔۔۔

ریشم
اداکارہ ریشم ابھی تک تنہا ہیں اور شادی سے دور ہیں۔۔۔لیکن ایک انٹرویو میں جب ان سے پوچھا گیا کہ آپ اور ریما میں سے بڑی کون ہے تو انہوں نے جھٹ مثال دی کہ ریما مجھ سے پانچ سال پہلے آئی تھی تو اب خود ہی دیکھ لیں کہ کون بڑا ہے اور کون چھوٹا۔۔۔لیکن کوئی ان کو سمجھائے کہ شوبز میں اینٹری سے عمر کا اندازہ نہیں ہوتا بلکہ شوبز میں کون کس عمر میں آیا یہ حقیقت جاننا ضروری ہے۔۔۔1995 میں ریشم کی پہلی فلم آئی اور ریما کی فلم اس سے پہلے لیکن بات یہ ہے کہ ریما اس وقت بھی ریشم سے تین سال چھوٹی ہی تھیں۔۔۔اب تین سال کا سچ بھی نہیں برداشت تو یہ سچ کیسے سنیں گی کہ ریشم نے پچاس کو کراس کردیا ہے۔۔۔

مدیحہ شاہ
اداکارہ مدیحہ شاہ کی بڑھتی عمر سے سب ہی واقف ہیں لیکن خود مدیحہ شاہ اس بات سے منہ موڑے بیٹھی ہیں۔۔۔انہیں لگتا ہے کہ ابھی بھی ان کی اینٹری اسکرین پر ہوتی ہے تو ریما اور ریشم جیسے نام کہیں پیچھے رہ جاتے ہیں۔۔۔وہ کچھ بھی کہہ لیں لیکن ریما سے دو سال بڑی ہی ہیں اور اگر انہیں اس بات سے ہے انکار تو گوگل ہی کرلیں ایک بار۔۔۔سچ خود ہی سامنے آجائے گا۔۔۔

میرا
اداکارہ میرا تو عمر چھپانے کی ماہر ہیں۔۔۔وہ ایک سال میں دو سے تین بار اپنی سالگرہ مناتی ہیں اور اس بات کا اقرار بھی کرتی ہیں کہ ان کو اپنی عمر صحیح سے یاد نہیں ہے۔۔۔جب بھی کسی شو میں ایسا کوئی ذکر ہوتا ہے تو وہ فورا حساب لگانے بیٹھ جاتی ہیں۔۔۔اور چیف صاحب کو ایسی فلم قرار دیتی ہیں جس میں ہیروئن کی عمر صرف چودہ سال تھی۔۔۔اس بات پر تو جاوید شیخ صاحب بھی پھنس سکتے ہیں کہ اتنی چھوٹی عمر کی بچی کو اتنا بولڈ بنا کر سامنے کیوں لائے۔۔۔لیکن میرا پھر میرا ہیں اور اس بات کا بھی آپ کو ایسا جواز دیں گی کہ آپ گھوم جائیں گے۔۔۔انہوں نے بارہا کہا ہے کہ وہ ریما سے کافی چھوٹی ہیں۔۔۔یہ سچ ہے کہ عمر کا فرق ضرور ہے لیکن یہ بھی حقیقت ہے کہ میرا بھی اب چالیس کراس کر چکی ہیں۔