معروف اداکار آصف رضا میر کی زندگی سے متعلق ایسے سچ جو آپ نہیں جانتے

یقیناً آصف رضا میر کسی تعارف کے محتاج نہیں- 80 کی دہائی میں انہوں نے ٹیلیویژن اسکرین پر راج کیا اور آج بھی انہیں لیجنڈری اداکار کے طور پر جانا جاتا ہے- دہائیاں گزرنے کے باوجود آج بھی ڈرامہ سیریل تنہائیاں کے زین کا کردار لوگوں کے دلوں میں زندہ ہے جو کہ آصف رضا میر نے ادا کیا تھا-

60 سال کی عمر کو پہنچنے کے باوجود آصف رضا میر ایک ہینڈسم اور پروقار شخصیت کے مالک ہیں-
 

یہ خاندان تین نسلوں سے شوبز انڈسٹری سے وابستہ ہے آصف رضا میر کے والد رضا میر فلم ڈائریکٹر اور پروڈیوسر ہونے کے علاوہ ایک فنکار بھی تھے- جبکہ آصف رضا میر کے بیٹے احد رضا میر بھی اس وقت شوبز انڈسٹری میں شہرت کی بلندیوں کو چھو رہے ہیں اور حال ہی میں احد نے ڈرامہ سیریل عہد وفا میں فوجی کا کردار ادا کر کے بڑی تعداد میں لوگوں کے دل جیتے اور بے پناہ مقبولیت حاصل کی-

دلچسپ بات یہ ہے اس فوجی کے والد یعنی آصف رضا میر اپنی جوانی میں مشہور ڈرامہ سیریل آنگن ٹیڑھا میں ایک چور کا کردار ادا کرچکے ہیں جو کہ انتہائی پسند کیا گیا تھا- یہ چور انتہائی اچھے گھرانے کا اور دردِ دل رکھنے والا تھا- آصف رضا میر نے اس چور کے کردار میں اپنے فنکارانہ صلاحیتوں سے جان ڈال دی- اور دیکھنے والوں کو فوجی کی طرح ایک چور سے بھی محبت کرنے پر مجبور کردیا-
 

آپ کو یہ جان کر حیرت ہوگی کہ آصف رضا میر کے والد شوبز انڈسٹری سے وابستہ ہونے کے باوجود کبھی یہ نہیں چاہتے تھے کہ ان کا بیٹا بھی اس انڈسٹری میں قدم رکھے- لیکن آصف رضا میر نے اپنے والد کے خلاف جا کر بہت کم عمری میں ہی اس انڈسٹری سے وابستہ ہوگئے اور انہیں ہمیشہ ان کی والدہ نے سپورٹ کیا-

آصف رضا میر نے انڈسٹری اپنی فنکارانہ صلاحیتوں کا لوہا اپنے بل بوتے پر منوایا اور منفرد اداکاری سے لاکھوں دل جیتے- انہوں نے پاکستانی ڈرامہ انڈسٹری کو بےشمار کامیاب ڈرامے دیے جن کی ایک طویل فہرست ہے اور ان تمام ڈراموں کا ذکر کرنا یہاں ممکن بھی نہیں- تاہم چند انتہائی مقبول ڈراموں میں تنہائیاں، آنگن ٹیڑھا، نشانِ حیدر، تان سین، آسمان چھونے دے، انوکھا بندھن، بادلوں پر بسیرا، تیرے لیے اور روگ شامل ہیں-
 

ایک وقت ایسا بھی آیا جب انہوں نے پوری طرح اداکاری چھوڑ دی۔ وہ کئی سال ٹیلیویژن پر نظر نہیں آئے تھے۔ لیکن ایک بار جب آصف رضا میر نے دوبارہ اداکاری کا آغاز کیا، تو انہیں چاہنے والوں کی جانب سے بےپناہ پسند کیا گیا-

آصف رضا میر نے ارینج میرج کی اور ان کی اہلیہ ثمرہ آصف ایک محبت کرنے اور خیال رکھنے والی خاتون ہیں اور اپنے شوہر کی سب سے بڑی فین ہیں- آصف رضا میر کے صرف دو بیٹے ہی ہیں احد رضا میر اور عدنان رضا میر لیکن حال ہی میں معروف اداکارہ سجل علی کی صورت میں اس خاندان کے افراد میں اب اضافہ ہوگیا-
 

سجل علی کی شادی آصف رضا میر کے بیٹے احد رضا میر سے حال ہی میں دبئی میں سرانجام پائی- اس شادی میں صرف خاندان کے چند قریبی افراد نے شرکت کی- اس وقت سجل علی کا شمار بھی پاکستان تیزی مقبولیت حاصل کرنے والی فنکاراؤں میں کیا جاتا ہے-

جہاں ایک جانب آصف رضا میر کو اس بات پر فخر ہے کہ ان کے بیٹے احد رضا میر بھی اس انڈسٹری میں اپنا نام پیدا کرنے میں کامیاب ہوچکے ہیں وہی دوسری طرف احد رضا میر کو بھی اس بات پر فخر ہے کہ وہ آصف رضا میر کے بیٹے ہیں لیکن وہ اس کے ساتھ ہی اپنی ایک الگ شناخت بنانا چاہتے ہیں-
 

آصف رضا میر کے دوسرے بیٹے 20 سالہ عدنان رضا میر مختلف مزاج کے مالک ہیں اور فی الحال وہ اپنے دادا، والد اور بھائی کی طرح شوبز انڈسٹری میں قدم رکھنے کے حوالے سے کوئی خاص ارادہ نہیں رکھتے-
 

آصف رضا میر کی اہلیہ نے کچھ وقت کے لئے ایک فوڈ چینل کے لیے پردے کے پیچھے بھی کام کیا لیکن بعد میں وہ اس نتیجے پر پہنچی کہ ان کی دلچسپی بالکل مختلف ہے۔ آصف رضا میر اور ثمرہ آصف میر کی شادی کو 28 سال ہوچکے ہیں۔