کرونا سے زیادہ کرونا کا خوف خطرناک نکل ، نوجوان ڈاکٹر طاہر عالمانی کے ساتھ ایسا کیا ہوا کہ اس نے خودکشی کر لی

جیسے جیسے اس دنیا ميں کرونا کے سبب ہلاکتوں میں اضافہ ہو رہا ہے اور پوری دنیا لاک ڈاؤن کے سبب اپنے گھروں میں قید رہ کر صرف اور صرف کرونا کے حوالے سے خبریں ہی دیکھ رہے ہیں تو ایسی چیزوں نے انسان کی نفسیات پر انتہائی برے اثرات مرتب کیے ہیں اور کمزور اعصاب کے حامل افراد اس خوف کے سبب کئی نفسیاتی عارضوں میں بھی مبتلا ہو رہے ہیں۔ اس وبائی صورتحال کا سب سے زیادہ اثر شعبہ صحت سے متعلق افراد پر پڑا ہے کیوں کہ ان کا واسطہ کرونا وائرس سے متاثر افراد سے براہ راست پڑتا ہے اور ان کے متاثر ہونے کا خطرہ بھی سب سے زیادہ ہوتا ہے ۔ اسی خوف کا شکار ایک ڈاکٹر طاہر عالمانی بھی تھے جن کا تعلق صوبہ سندھ کے ضلع ٹنڈو محمد خان سے تھا اور وہ سونو خان عالمانی نامی گازں کے رہائشی تھے اور لیاقت یونی ورسٹی ہسپتال حیدرآباد کے آئی سی یو کے شعبے میں بطور اینستھسسٹ کے اپنے فرائض انجام دے رہے تھے-

کرونا کے خلاف ڈاکٹروں کو ملنے والی ناکافی سہولیات
نوجوان ڈاکٹر طاہر عالمانی جن کی عمر 27 سال تھی انہوں نے کرونا وائرس کی وبا کے پھیلاؤ کے بعد ہسپتال میں موجود ناکافی حفاظتی سہولیات کے سبب ڈاکٹروں کے کرونا وائرس میں مبتلا ہونے کے خطرے کے خلاف آواز اٹھائی- مگر جب انتظامیہ نے اس حوالے سے کسی بھی قسم کے اقدامات نہ کیے تو ڈاکٹر طاہر عالمانی نے نوکری سے استعفی دے دیا کیوں کہ وہ نہیں چاہتے تھے کہ ناکافی انتظامات کے سبب وہ نہ صرف خود اس وائرس میں مبتلا ہوں بلکہ اپنے گھر والوں کے لیے بھی خطرے کا باعث بنیں-
 

انتظامیہ کی بد انتظامی
ڈاکٹر طاہر عالمانی کے استعفے کو قبول کرنے سے انکار کرتے ہوئے اس کے پراسس کی تکمیل تک انتظامیہ نے ڈاکٹر طاہر کو اپنی خدمات جاری رکھنے کا کہہ دیا جس پر ڈاکٹر طاہر نے 15 دن کی چھٹی کی درخواست دے دی تاکہ تب تک انتظامیہ ڈاکٹروں کے تحفظ کے لیے کچھ اقدامات کر لے- مگر کرونا کے باعث ہونے والی ایمرجنسی کے سبب ان کو صرف سات دن کی چھٹی ملی-

خود کشی کی پہلی کوشش
ڈاکٹر طاہر ان دنوں شدید ذہنی دباؤ کا شکار تھے وہ ڈیوٹی پر نہیں جانا چاہتے تھے کیوں کہ ان کو ڈر تھا کہ بغیر حفاظتی انتظامات کے آپریشن کرنے کے نتیجے میں وہ کرونا کا شکار ہو سکتے ہیں- اس لیے انہوں نے سات دن کی ملنے والی چھٹیوں کے ختم ہونے سے قبل اپنی نس کاٹ کر خود کشی کی پہلی کوشش کی- مگر اس سے ان کی جان بچ گئی مگر اس کا فائدہ یہ ہوا کہ ان کی بیماری کے سبب ان کو ہسپتال سے مزيد کچھ دنوں کی چھٹی مل گئی-
 

خودکشی کی آخری کوشش
اس بار جب پھر ہسپتال جانے کے دن نزدیک آئے تو ڈاکٹر طاہر نے ایک بار پھر خود کشی کی کوشش کی اور اس بار ان کی یہ کوشش کامیاب ہو گئی- اس نوجوان ڈاکٹر کو انتظامیہ کی بے رحمی کے سبب ہم سب نے ہمیشہ کے لیے کھو دیا اور یہ صرف ایک ڈاکٹر نہیں ہے بلکہ ہمارے سیکڑوں ڈاکٹر اور پیرا میڈیکل اسٹاف ناکافی حفاظتی سہولیات کے سبب نہ صرف اس مہلک بیماری میں مبتلا ہو چکے ہیں بلکہ اپنے گھر والوں کو بھی متاثر کر چکے ہیں-