تم دونوں تین دن کمرے سے باہر نہیں آؤ گے --- دنیا بھر میں شادی کی عجیب و غریب رسومات

دنیا بھر کے مختلف ممالک میں شادی کے موقع پر اپنی ثقافت اور روایات کے مطابق مخصوص رسم و رواج اپنائے جاتے ہیں، جن کا مقصد شادی کی تقریب سے بھرپور طور پر لطف اٹھانا ہوتا ہے۔ لیکن بعض رسم و رواج انتہائی انوکھے اور عجیب و غریب بھی ہوتے ہیں جو کہ یا تو بہت دلچسپ معلوم ہوتے ہیں یا پھر بعض اوقات ان کا پورا کرنا بھی اتنا آسان نہیں ہوتا- آئیے ایسی ہی چند دنیا بھر میں شادی کی عجیب و غریب رسومات کے بارے میں بتاتے ہیں-

جوتا چھپائی

جوتا چھپائی کی رسم بھارت اور پاکستان میں ہونے والی شادیوں کی سب سے اہم رسم سمجھی جاتی ہے- اس میں دلہن کی سہیلیاں یا بہنیں دولہے کا ایک جوتا چھپا لیتی ہیں جو کہ ایک بھاری رقم وصول کرنے کے بعد واپس کیا جاتا ہے-

تین دن کمرے میں

انڈونیشیا میں دولہا اور دلہن کو تین دن کے لیے کمرے میں بند کردیا جاتا ہے اور انہیں باہر آنے کی اجازت نہیں ہوتی- بظاہر یہ ایک دلچسپ رسم معلوم ہوتی ہے لیکن صبر کیجیے اس کا ایک تلخ پہلو بھی ہے- جی ہاں ان دولہا دلہن کو تین دن تک باتھ روم استعمال کرنے کی اجازت بھی نہیں ہوتی-

سفید رنگ

جاپانی دلہن رسم کے طور پر ایک موقع پر صرف سفید رنگ کا ہی استعمال کرتی ہے- اس رسم میں دلہن سر سے لے کر پاؤں تک سفید رنگ ہی زیب تن کیے ہوتی ہے- یہاں تک کہ دلہن نے میک اپ بھی سفید رنگ کا ہی کر رکھا ہوتا ہے- اس موقع پر پہنے جانے والے خاص لباس کے ساتھ ایک خاص بڑی سے ٹوپی بھی ہوتی ہے جسے 'tsunokushi' کہا جاتا ہے- جاپانیوں کا ماننا ہے کہ یہ ٹوپی حسد والے سینگ چھپاتی ہے اور یہ حسد دلہن کو اپنی ساس کی طرف سے محسوس ہوسکتی ہے-

حجام دوست

یونان میں دولہا کے دوست ہی اس کے حجام بن جاتے ہیں اور دولہا کی شیو بناتے ہیں- اس شیو کے بعد دولہا کی ساس اسے شہد اور بادام کھلاتی ہے- یہ بھی ایک انتہائی دلچسپ رسم ہوتی ہے جسے بڑے زور و شور سے ادا کیا جاتا ہے-

مٹی کے برتن

جرمنی میں دولہا دلہن جب اپنا گھر بسانے کا آغاز کرتے ہیں تو اس سے قبل انہیں ان مٹی کے برتنوں کی صفائی کرنا ہوتی ہے جو ان کے رشتے داروں نے پھینکے ہوتے ہیں- ان لوگوں کا ماننا ہے کہ اس سے نوبیاہتا جوڑا بری روحوں سے محفوظ رہتا ہے-

وہیل کے دانت

فجی میں جب لڑکا لڑکی کے والد کے پاس لڑکی کا ہاتھ مانگنے جاتا ہے تو اس وقت ایک انتہائی دلچسپ رسم ادا کی جاتی ہے- جی ہاں اس وقت لڑکا لڑکی کے والد یعنی اپنے ہونے والے سسر کو وہیل کے دانت تحفے میں پیش کرتا ہے-

شیر خوار بچہ

چیک باشندے دولہا دلہن کے بستر پر رسم کے طور پر کچھ وقت کے لیے کسی شیر خوار بچے کو ضرور بیٹھاتے ہیں- ان کا ماننا ہے کہ اس طرح نوبیاہتا جوڑے کو خدا اولاد سے ضرور نوازتا ہے - اس کے علاوہ مہمان جوڑے پر دال ، چاول اور مٹر کے دانے بھی پھینکتے ہیں اور اس کا مقصد بھی اولاد ہی ہوتا ہے-