کرونا وائرس نے کیا شادیوں کو محدود، لاکھوں روپے والے عروسی ملبوسات بنانے والے کاریگر اس وقت کس حال میں زندگی گزارنے پر مجبور

شادی کی تاریخ طے ہونے کے بعد جو کام سب سے پہلے کیا جاتا ہے وہ دلہن کے عروسی لباس کا آرڈر دیا جاتا ہے- اس کے لیے گھر کی خواتین بڑے بڑے بوتیک کے چکر کاٹتی ہیں جو ان کو مختلف ڈیزائن کے مہنگے ملبوسات ٹھنڈی دکانوں میں بٹھا کر دکھاتے ہیں مہنگے مشروبات سے ان خواتین کی میزبانی کی جاتی ہے اور اس کے بعد انتہائی احترام کے ساتھ لاکھوں روپے کے آرڈر یہ ڈیزائنر لیتے ہیں -

موسم کی مناسبت سے جوڑے کا رنگ اور اس کے اوپر مہنگا زری کا کام اور اس کی ڈیزائنگ طے کی جاتی ہے نگ اور موتیوں کی سجاوٹ کے سبب ان جوڑوں کی قیمت مزید بڑھ جاتی ہے- منفرد نظر آنے کے شوق میں اس جوڑے میں ایسے ایسے اضافے کروائے جاتے ہیں جو اس جوڑے کی خوبصورتی کو چار چاند لگا دیتے ہیں ہر نگ اور موتی کا اضافہ اس جوڑے کی قیمت کو اور بھی بڑھا دیتا ہے-

اور بلاآخر لاکھوں روپے کا آرڈر وصول کر لیا جاتا ہے جس میں ایڈوانس کے نام پر خطیر رقم لی جاتی ہے اور چھ مہینے بعد کا اور بعض اوقات سال بعد کا ٹائم دے دیا جاتا ہے جب کہ اس جوڑے کو تیار کرنا ہوتا ہے اور اس طرح صرف چند گھنٹوں کے لیے پہنے جانے والے جوڑے کی تیاری کا عمل شروع ہو جاتا ہے-

عروسی جوڑے کی تیاری کا پہلا مرحلہ

ڈیزائنر سب سے پہلے مقررہ کپڑے کی خریداری کرتا ہے اور اس کو طے شدہ رنگ میں رنگواتا ہے اس کے لیے جوڑے کے ساتھ اس کا دوپٹہ بھی رنگوایا جاتا ہے عام طور پر شیفون ، آرکنڈی یا ٹشو کا استعمال ایسے جوڑوں کے لیے کیا جاتا ہے- بعض اوقات سردی کی مناسبت سے ویلوٹ کا کپڑا بھی لیا جا سکتا ہے اس کے بعد کپڑے کی مناسبت سے دوپٹے کو رنگوایا جاتا ہے-

عروسی جوڑے کی تیاری کا دوسرا مرحلہ

عروسی جوڑا عام طور پر یا تو شرارے یا غرارے کی صورت مین ہوتا ہے یا پھر آج کل لانگ میکسی کے انداز کے سوٹ یا پھر لمبے گاؤن کی صورت میں بھی ہوتے ہیں جن کے اوپر زری کا بھاری کام کروایا جاتا ہے- اس لیے مقررہ ڈیزائن کے مطابق اس کے اوپر بھاری کام کا چھاپا کروایا جاتا ہے ڈیزائنر مختلف چھاپوں کے ڈيزائن کا مختلف انداز میں استعمال کر کے جوڑے کو ایک نیا رنگ دیتا ہے -

عروسی جوڑے کا سب سے اہم مرحلہ ذری کا کام

یہ مرحلہ سب سے اہم ہوتا ہے کراچی میں اس مرحلے کے کاریگر عام طور پر کورنگی یا پھر بنارس کی کچی آبادیوں میں رہائش پزیر ہوتے ہیں- ہر ڈیزائنر کے ذری کے کام کے لیے اپنے مقرر کاریگر ہوتے ہیں جن کو وہ لاکھوں روپے کے اس جوڑے کے بدلے میں صرف اور صرف چند ہزار دیتے ہیں-

کورنگی کے کچھ کاریگروں کے مطابق ان کو صرف چھ سو روپے دیہاڑی دی جاتی ہے اور ان کو آٹھ سے دس دن میں اپنا کام مکمل کرنا ہوتا ہے- اس کے بدلے میں ان کو ایک جوڑے کے تقریبا پانچ سے چھ ہزار ملتے ہیں-

کرونا وائرس کے سبب ذری کے کاریگروں کے مسائل

چودہ مارچ سے ہونے والے کرونا وائرس کے سبب لاک ڈاون کی وجہ سے ملک بھر کے ذری کے کاریگر شدید مسائل کا سامنا کر رہے ہیں اور بہت سارے کاریگر مجبوراً اس کام کو چھوڑ کر محنت مزدوری کرنے اور ٹھیلے لگانے پر مجبور ہو گئے ہیں- ان کے مطابق شادی کی بڑی تقریبات پر پابندی کے سبب لوگوں نے مہنگے ملبوسات کا آرڈر دینا بند کر دیا ہے جس کے سبب وہ لوگ ہاتھ پر ہاتھ دھر کر بیٹھے ہیں-لاکھوں روپے کے ان جوڑوں کا معاوضہ ایک جانب تو ان کو انتہائی قلیل مل رہا ہے اور دوسری جانب کام نہ ملنے کے سبب دیہاڑی دار طبقہ بے روز گار ہو گیا ہے اور اس کام کو چھوڑ کر دوسرے کاموں پر مجبور ہو گئے ہیں-

حالیہ دنوں میں کرونا وائرس کی دوسری لہر کی وجہ سے یہ کاریگر ایک بار پھر سے خوفزدہ ہیں اور ان کو اندیشہ ہے کہ ایک بار پھر اگر شادی بیاہ کی تقریبات پر پابندی لگ گئی تو وہ بھوکے مرنے پر مجبور ہو جائيں گے یا پھر ہمیشہ کے لیے اس کام کو خیر آباد کہہ دیں گے-

< Previous پاکستان کے تاریخی لمحات تصاویر کے آئینے میں NEXT > بیٹے کے لیے رشتہ ڈھونڈنے والی ماؤں کی عجیب شرائط جو حیران کر ڈالیں