مجھے اپنی شادی پر کیوں نہیں بلایا، حرا مانی کا اپنی ساتھی اداکاراؤں سے شادی پر نہ بلانے پر شکوہ

شوبز سے جڑے لوگ بظاہر چمکتے چہروں کے ساتھ ایک دوسرے سے بہت اچھی طرح ملتے ہوئے نظر آتے ہیں مگر حقیقت میں ان کے تنازعات ہمیشہ سے چلتے رہتے ہیں- ایک ہی پروفیشن میں کام کرنے کے سبب ایک جانب تو ان کے درمیان پروفیشنل جیلسی بہت ہوتی ہے اس کے علاوہ جس طرح ایک گھر میں رہنے والے برتن بھی آپس میں ٹکراتے ہیں اسی طرح ایک ساتھ کام کرتے ہوئے نوک جھونک ہو جانا ایک فطری بات ہے- یہی وجہ ہے کہ شوبز کے افراد کے جھگڑے سامنے آتے رہتے ہیں-

مگر انتہائی کم وقت میں اپنے کام اور صلاحیت سے جگہ بنانے والی حرا مانی کے قریبی حلقوں کا یہ ماننا ہے کہ حرا مانی ایک بہت ہی سادہ انسان ہیں اور ان کے اندر اتنی شہرت اور کامیابی کے باوجود وہ نخرہ اور غرور اب تک نہیں آسکا جو کہ شوبز کے لوگوں کا وطیرہ ہے- یہی وجہ ہے کہ جو بھی بات ان کے دل میں ہوتی ہے وہ منہ پر کہہ دیتی ہیں اس وجہ سے کچھ افراد ان کو منہ پھٹ بھی کہتے ہیں-

حالیہ دنوں میں میرا سیٹھی کے یو ٹیوب چینل کے لیے ان کا ایک انٹرویو سامنے آیا جس میں میرا سیٹھی نے ان سے سوال کیا کہ شوبز کے لوگ ایک دوسرے کے دوست نہیں ہوتے- جس پر حرا نے اپنی سادگی سے بھر پور جواب دیا کہ ان کا یہ ماننا ہے کہ شوبز کے لوگ بھی ایک دوسرے کے دوست ہو سکتے ہیں اور دوست تو وہی ہوتا ہے جس سے ہم اپنے خوشی اور غم بانٹ سکیں-

مگر اس کے ساتھ ہی انہوں نے اپنی ازلی سادگی اور دل کی بات دل میں نہ رکھنے والی عادت کے مطابق میرا سیٹھی سے یہ گلا بھی کر دیا کہ شوبز کی ساتھی اداکارائيں جب شادی کرتی ہیں تو پتہ نہیں کیوں ان کو نہیں بلاتی ہیں

اس موقع پر انہوں نے سب سے پہلے سجل علی کا نام لیا جس نے انہیں اپنی شادی پر نہیں بلایا اس کے بعد اقرا عزیز کا نام لیا جس نے بھی اپنی شادی پر ان کو نہیں بلایا اس کے بعد انہوں نے سارہ خان کا نام لیا یہاں تک کہ انہوں نے میرا سیٹھی کو ان کے منہ پر کہہ دیا کہ آپ نے بھی اپنی شادی پر مجھے نہیں بلایا تھا-

جس پر میرا سیٹھی ایک دم سے شرمندہ ہو گئيں اور ان کا کہنا تھا کہ میں نے واٹس ایپ پر اپنے ساتھی اداکاروں کو شادی کی دعوت دی تھی مگر چونکہ میرے پاس آپ کا نمبر نہیں تھا اس وجہ سے میں آپ کو دعوت نہ دے سکی تھی-

یاد رہے کہ سجل علی کو ٹی وی پر متعارف کروانے کا سہرا حرا مانی اور ان کے شوہر مانی کے سر ہے جنہوں نے ان کو پہلی بار اپنے ایک ٹی وی شو میں بریک دیا تھا- اس حساب سے حرا مانی کا سجل علی سے گلہ تو بنتا ہی ہے ۔ امید ہے کہ اب آنے والے دور میں ساتھی اداکار حرا مانی کو یاد رکھیں گے اور ان کو اپنی شادی پر ضرور بلائيں گے کیوں کہ ان کا یہ بھی کہنا ہے کہ ان کو شادی پر جانے کا بہت شوق ہے-

< Previous محبت میں غیر سنجیدہ نظر آئیں۔۔۔شوبز ستارے جن کی پہلی محبت کوئی اور تھا NEXT > بیگم کے ساتھ تصویر اچھی آتی ہے۔۔۔شوبز فنکار جو تصاویر زیادہ تر بیگم کے ساتھ ہی کھنچواتے ہیں۔۔۔