سب کچھ خرچ ہوگیا لیکن آخرت سنور گئی، جیل کے قیدیوں کے سکھائے گئے ایک عمل نے پولیس افسر کی زندگی بدل دی

عام طور پر تو یہی سننے میں آتا ہے کہ جیل میں جو قیدی ہوتے ہیں وہ کسی نہ کسی جرم کی وجہ سے وہاں آتے ہیں اس وجہ سے ان کی صحبت سے پرہیز کرنی چاہیے- لیکن شاہ نواز مالحی نامی سندھ پولیس کے ایک ریٹائر افسر ایسے بھی ہیں جنہوں نے جیل میں قیدیوں پر ڈیوٹی کے دوران ان سے ایک ایسا ہنر سیکھا جس نے ان کی دین اور دنیا دونوں ہی سنوار دی-

تفصیلات کے مطابق شاہ نواز ملحی کا تعلق سندھ پولیس سے تھا اور جب ان کی ڈیوٹی جیل میں لگائی گئی تو انہوں نے وہاں ڈیوٹی کے دوران دیکھا کہ قیدی قلم یا پینسل پر دھاگوں کی مدد سے فارغ وقت میں مختلف نام لکھتے تھے اور ان کی یہ دستکاری کافی پسند کی جاتی تھی اور لوگ اس کو خرید کر اپنے پیاروں کو تحفے میں بھی دیتے تھے-

ڈیوٹی کے دوران شاہ نواز ملحی نے یہ فن قیدیوں سے نہ صرف سیکھا بلکہ اس میں مہارت بھی حاصل کر لی شاہ نواز کو بھی شوق پیدا ہوا کہ وہ اپنے محبوب کو ایک منفرد تحفہ دے۔ اللہ کی بارگاہ میں کچھ خاص کرنے کے شوق نے ان کو ایک اچھوتا آئيڈیا دیا اور انہوں نے قرآن کی 114 سورتوں کو اس طرح سے لکھنے کا فیصلہ کیا-

یہ کام اگرچہ آسان نہ تھا مگر جذبہ اگر مضبوط ہو اور محبت کے ساتھ عشق کا جنون بھی شامل ہو تو راستے خود بخود آسان ہو جاتے ہیں ایسا ہی کچھ شاہ نواز کے ساتھ بھی ہوا- سال 2014 میں ریٹائرمنٹ کے بعد سب سے پہلے انہوں نے قرآن کی تمام سورتوں کے نام آسمانی بیک گراؤنڈ کے ساتھ تحریر کیا جس میں ان کی آٹھ سے دس پنسلوں کا استعمال ہوا-

اس کے بعد انہوں نے اس عمل کو بڑھانے کا فیصلہ کیا اور ایک مختلف رسم الخط کے ساتھ سیاہ بیک گراؤنڈ کا استعمال کیا جس میں ہر سورت کے لیے علیحدہ سے پنسلوں پر لکھا گیا اور ہر سورت کے مکمل ہونے کے بعد انہوں نے ان تمام پنسلوں کو کلپ کی مدد سے علیحدہ سے فریم میں جوڑ کر لگا دیا گیا جو کہ دیکھنے والے کو انتہائي خوبصورت لگتا تھا-

اس طرح سے تقریباً آٹھ ہزار پنسلوں کی مدد سے دس سال کے طویل عرصے میں انہوں نے مکمل قرآن کی بنائی مکمل کی ان کو بنانے میں عام پنسلوں کے بجائے ایسی خاص لکڑی سے بناںی گئی پنسلوں کا استعمال کیا گیا جس کو دیمک اور دوسرے کیڑے خراب نہ کر سکیں-

اس کام کے حوالے سے شاہ نواز کا یہ بھی کہنا تھا کہ ان کو بچپن سے اس بات کا شوق تھا کہ وہ کوئی ایسا کام کریں جو ان سے قبل کسی نے نہ کیا ہو- اس کام کے لیے انہوں نے دس سال تک ہر روز آٹھ گھنٹے کام کیا اور اس پر اٹھنے والے اخراجات کے حوالے سے ان کا کہنا تھا کہ اس پر انہوں نے اپنی ساری جمع پونجی لگا دی- یہاں تک کہ اس پر اٹھنے والے اخراجات کے لیے انہوں نے اپنا بڑا گھر بھی فروخت کر دیا اور ایک چھوٹے سے گھر میں رہائش اختیار کرلی-

قرآن کی تکمیل کے بعد انہوں نے مکمل ‍قرآن کو فریموں کی صورت میں کراچی میں نمائش کے لیے بھی پیش کیا جس کو لوگوں نے بہت سراہا اب ان کی خواہش ہے کہ ان کے اس کام کو اللہ کی بارگاہ میں بھی قبولیت مل جائے تاکہ وہ جب بارگاہ خداوندی میں پیش ہوں تو اپنے اس عمل پر فخر کر سکیں-