|
چین میں معذور افراد کی فلاح کے لیے کام کرنے والی چائنا
ڈس ایبلڈ پرسنز فیڈریشن کے مطابق معذوری کی روک تھام کے لیے پانچ سالہ قومی
منصوبے پر عمل درآمد کے قومی اقدامات میں آسانی سے پیش رفت ہو رہی ہے اور
2025 کے لیے مقرر کردہ کچھ اہداف مقررہ وقت سے پہلے حاصل کر لیے گئے ہیں۔
فیڈریشن نے اس حوالے سے جاری دستاویز میں بتایا ہے کہ معذوری کی روک تھام
کے علم کے فروغ اور پیدائشی نقائص، معذوری پیدا کرنے والے عوارض اور
بیماریوں کے ساتھ ساتھ چوٹوں کی وجہ سے ہونے والی معذوریوں کی روک تھام پر
اہم پیش رفت ہوئی ہے۔معذوری کی بحالی کی خدمات میں بھی بہت اضافہ کیا گیا
ہے۔ملک میں اب تک 76 فیصد نوبیاہتا جوڑوں کے قبل از شادی طبی معائنے کیے
گئے ہیں اور قبل از پیدائش اسکریننگ کی شرح 91.3 فیصد تک پہنچ گئی ہے۔اس کے
علاوہ، ہائی بلڈ پریشر اور ذیابیطس جیسے بڑے دائمی امراض میں مبتلا 60 فیصد
سے زیادہ مریضوں کو کمیونٹی کی سطح پر معیاری مینجمنٹ پروگراموں کے تحت
رکھا گیا ہے، جبکہ بنیادی بحالی کی خدمات اب 85 فیصد سے زیادہ معذور افراد
کے لئے قابل رسائی ہیں۔
چین کے نیشنل ہیلتھ کمیشن کے مطابق چین نے شدید ذہنی امراض میں مبتلا افراد
کے لیے ایک مکمل پروسیس سروس سسٹم قائم کیا ہے، جس میں 96 فیصد سے زائد
رجسٹرڈ مریضوں کو مناسب انتظام حاصل ہے۔ کوکلیر امپلانٹس کی تحقیق، ترقی
اور اطلاق نے چین میں سماعت سے محروم تقریباً 90 فیصد بچوں کو سننے، بولنے
اور باقاعدگی سے کنڈرگارٹن اور اسکولوں میں جانے کے قابل بنایا ہے۔معذوری
کی بحالی، رکاوٹ سے پاک ماحولیاتی ترقی اور معاون ٹیکنالوجی کے شعبوں میں
سائنسی تحقیقی منصوبوں کو کلیدی تحقیق اور ترقی کے لئے چین کے منصوبے میں
شامل کیا گیا ہے.فیڈریشن نے اب تک اس طرح کے سات منصوبوں کا اہتمام اور
نفاذ کیا ہے ، جس میں 25 یونیورسٹیوں ، 16 تحقیقی اداروں اور 24 کاروباری
اداروں نے شرکت کی ہے۔
گزشتہ پانچ سالوں میں ، فیڈریشن نے معاون ٹیکنالوجی پر تحقیق اور اطلاق کو
فروغ دینے کے لئے 300 سے زیادہ تحقیقی منصوبے شروع کیے ہیں۔ متعدد تحقیقی
نتائج پہلے ہی وسیع پیمانے پر لاگو کیے جا چکے ہیں، جو معذور افراد کے
معیار زندگی کو بہتر بنانے میں اہم کردار ادا کر رہے ہیں۔
حالیہ عرصے میں چین کی جانب سے خصوصی افراد کی سہولت کے لئے ثقافتی،
مالیاتی اور سماجی مقامات تک رسائی کو بہتر بنانے کے لئے ان گنت قومی
اقدامات کیے گئے ہیں۔ بسوں نے نابینا مسافروں کے لیے ذہین
معاونت کا نظام نصب کیا ہے۔یہ امر بھی قابل تقلید ہے کہ ملک میں خصوصی
افراد کی سہولت کے لیے مسلسل نت نئی ٹیکنالوجیز متعارف کروائی جا رہی
ہیں۔اسی سلسلے کی ایک تازہ کڑی نیوی گیشن ایپس پر وہیل چیئر نیوی گیشن
سروسز متعارف کروانا ہے ، جس سے محدود نقل و حرکت والے افراد کے لئے سفر کو
بہت آسان بنایا گیا ہے۔وہیل چیئر نیوی گیشن سروس نے حال ہی میں اپنی کوریج
میں توسیع کرتے ہوئے نہ صرف بیرونی رکاوٹوں سے پاک راستوں کو شامل کیا ہے
بلکہ کچھ بڑے مالز میں انڈور روٹس بھی شامل کیے ہیں ، جس سے وہیل چیئر
صارفین اپنے سیل فون پر یہ معلوم کرسکتے ہیں کہ وہ کس مال میں رکاوٹ سے پاک
دروازے ، لفٹ اور باتھ روم کہاں تلاش کرسکتے ہیں۔اس سہولت کی مدد سے وہیل
چیئر استعمال کرنے والے افراد کی زندگیوں میں سہولت لائی گئی اور وقت کی
بچت سمیت روزمرہ معمولات زندگی میں اُن کی شمولیت کا عمل آسان بنایا گیا
ہے۔
|