|
چینی قانون سازوں نے حال ہی میں ملک میں ریٹائرمنٹ کی
قانونی عمر میں بتدریج اضافے کے فیصلے کو منظور کرنے کے حق میں ووٹ دیا، جو
1950 کی دہائی کے بعد اس انتظام میں پہلی ایڈجسٹمنٹ ہے۔فیصلے کے مطابق 2025
سے شروع ہونے والے 15 سالہ عرصے کے دوران مردوں کے لئے قانونی ریٹائرمنٹ کی
عمر بتدریج 60 سے بڑھا کر 63 کردی جائے گی جبکہ خواتین کیڈرز اور خواتین
بلیو کالر ورکرز کے لئے بالترتیب یہ عمر 55 سے بڑھا کر 58 اور 50 سے بڑھا
کر 55 کردی جائے گی۔ 2030ء سے ماہانہ فوائد حاصل کرنے کے لئے ضروری بنیادی
پنشن کنٹری بیوشن کے کم از کم سال بتدریج 15 سال سے بڑھا کر 20 سال کر دیے
جائیں گے۔
دریں اثنا، لوگوں کو پنشن کنٹری بیوشن کے کم از کم سال تک پہنچنے کے بعد
رضاکارانہ طور پر تین سال سے زیادہ پہلے ریٹائر ہونے کی اجازت ہوگی۔ لیکن
اسے پچھلی قانونی عمر سے پہلے ریٹائر ہونے کی اجازت نہیں ہے۔نئی پالیسیاں
افراد کو یہ بھی اجازت دیں گی کہ اگر وہ آجروں کے ساتھ کسی معاہدے پر پہنچ
جاتے ہیں تو وہ ریٹائرمنٹ کو بعد کی تاریخ تک ملتوی کرسکتے ہیں ، لیکن اس
طرح کی تاخیر تین سال سے زیادہ نہیں ہونی چاہئے۔
اس فیصلے میں اولڈ ایج انشورنس ترغیبی میکانزم کو بہتر بنانے، ایمپلائمنٹ
فرسٹ حکمت عملی کو نافذ کرنے، اپنی قانونی ریٹائرمنٹ کی عمر کو عبور کرنے
والے کارکنوں کے بنیادی حقوق اور مفادات کو یقینی بنانے اور بزرگوں کی دیکھ
بھال اور بچوں کی دیکھ بھال کی خدمات کو بہتر بنانے کے اقدامات کی بھی
نشاندہی کی گئی ہے۔اس دستاویز میں بے روزگار عمر رسیدہ کارکنوں کی فلاح و
بہبود اور خصوصی پیشوں میں کام کرنے والوں کے لئے قبل از وقت ریٹائرمنٹ سے
متعلق مخصوص دفعات شامل ہیں۔
کمیونسٹ پارٹی آف چائنا (سی پی سی) کی 20 ویں قومی کانگریس اور 20 ویں سی
پی سی سینٹرل کمیٹی کے تیسرے کل رکنی اجلاس نے ملک میں قانونی ریٹائرمنٹ کی
عمر کو بتدریج بڑھانے کے لئے واضح انتظامات کیے ہیں۔چینی قانون سازوں کی
جانب سے منظور کیا گیا یہ منصوبہ چین میں اوسط عمر، صحت کی صورتحال، آبادی
کے ڈھانچے، تعلیم کی سطح اور افرادی قوت کی فراہمی کے جامع جائزے کی بنیاد
پر تشکیل دیا گیا ہے۔
ریٹائرمنٹ کی عمر میں اضافے کے ساتھ ساتھ حالیہ عرصے میں چینی حکام نے
روزگار کی فراہمی کے حوالے سے بھی موئثر پالیسیاں اپنائی ہیں۔ ایسی
پالیسیاں وضع کی جا رہی ہیں جن سے فراہمی روزگار چینلز کو وسیع کرنے اور
یونیورسٹی سے فارغ التحصیل افراد کے روزگار کو فروغ دینے کے لیے بہتر خدمات
فراہم کی جا سکیں۔ یونیورسٹی سے فارغ التحصیل افراد کے لیے روزگار اور
انہیں اپنا کاروبار شروع کرنے کی سہولت کے لیے متعدد اقدامات متعارف کرائے
گئے ہیں۔
ان کوششوں کے ثمرات یوں سامنے آئے ہیں کہ بیرون ملک تعلیم حاصل کرنے والے
چینی طلباء چین کی روزگار مارکیٹ کی مسابقت میں تیزی سے اضافہ کر رہے
ہیں۔ایمپلائمنٹ پلیٹ فارم لنکڈ ان کے ایک حالیہ سروے کے مطابق 2023 میں
بیرون ملک ڈپلومہ حاصل کرنے والے 84 فیصد کالج گریجویٹ چین واپس آئے جو
گزشتہ سال کے 32 فیصد کے مقابلے میں ایک بہت بڑی تعداد ہے۔روزگار پلیٹ فارم
کے مطابق خاندان کی قربت ، ایک آسان رہن سہن کا ماحول اور ایک جانا پہچانا
ثقافتی ماحول ایسے تین اہم عوامل ہیں جو نوجوانوں کو وطن واپسی کی جانب
راغب کرتے ہیں۔ 2023 میں، بیرون ملک تعلیم حاصل کرنے والے 80 فیصد چینی
طالب علم آبائی شہر وں میں ملازمت تلاش کرنے کے لئے تیار تھے، جو 2022 کی
نسبت 66 فیصد اضافہ تھا۔واپسی کے بعد، کچھ اہم صنعتوں میں خالی آسامیوں اور
تنخواہوں میں اضافے کی وجہ سے، زیادہ سے زیادہ گریجویٹس نے کاروبار شروع
کرنے یا مزید اعلیٰ تعلیم کے لئے جانے کے بجائے ملازمتیں تلاش کرنے کا
انتخاب کیا ہے.چین کی ایک جاب سائٹ کے مطابق سب سے زیادہ تنخواہ لینے والے
کیریئرز میں مصنوعی ذہانت، فنانس اور انشورنس سرفہرست ہیں۔
اسی طرح چینی جامعات کے صدور اور دیگر رہنماؤں کی حوصلہ افزائی کی جا رہی
ہے کہ وہ اپنے طلباء کے لیے ملازمت کے مزید مواقع حاصل کرنے کی خاطر
کارپوریٹ مصروفیات میں اضافہ کریں۔ملک بھر کی جامعات کو کیمپس میں جاب
فیئرز اور ایسے پروگرامز ترتیب دینے چاہیے جن میں آجروں کو مدعو کیا جائے۔
جامعات کی یہ کوشش ہونی چاہیے کہ اعلیٰ معیار کی کیریئر اسپورٹ اور جامع
معلومات فراہم کی جائیں اور ایسے اقدامات متعارف کروائے جائیں جن میں
گریجویٹس کو فراہمی روزگار ایک نمایاں ترجیح ہو۔
|