|
چین ایک طویل عرصے سے موسمیاتی تبدیلی سے نمٹنے پر نمایاں
زور دیتا آ رہا ہے، موسمیاتی تبدیلی پر اقوام متحدہ کے فریم ورک کنونشن کا
ابتدائی دستخط کنندہ ہے اور پیرس معاہدے پر دستخط اور توثیق کرنے والے
اولین ممالک میں سے ایک ہے۔ حالیہ برسوں میں چین نے ماحولیاتی تحفظ کو آگے
بڑھانے کے لئے اپنے اقدامات کو جدید خطوط پر استوار کیا ہے ، ایک خوبصورت
چین کی تعمیر کی کوششوں کی حمایت کرنے والے ادارہ جاتی فریم ورک کی وضاحت
کی گئی ہے، اور ایک صاف اور خوبصورت دنیا کی تخلیق کے بارے میں چینی دانش
کو نہایت عمدگی سے اجاگر کیا گیا ہے۔
انہی کوششوں کو آگے بڑھاتے ہوئے چینی حکام کی جانب سے حال ہی میں جاری ہونے
والی ایک دستاویز کے مطابق ملک کے مزید شہر اور اضلاع پائیدار ترقی کو فروغ
دینے کے مرکزی اقدام کے طور پر سرکاری خریداری کے شعبے میں سبز تعمیر کی
حمایت کریں گے۔وزارت خزانہ اور دو دیگر محکموں کی جانب سے جاری کردہ
دستاویز کے مطابق اس سال سے 101 شہروں اور اضلاع میں سرکاری خریداری کے
ذریعے سبز مواد کے استعمال اور معیاری تعمیرات کی حوصلہ افزائی کی جائے گی۔
معاون پالیسی کے تحت آنے والے منصوبوں میں اسپتال، اسکول، دفتری عمارتیں،
پیچیدہ عمارتیں، نمائش ہال، کنونشن سینٹرز، اسٹیڈیم، سستی رہائش اور شہری
تجدید کے منصوبے شامل ہیں، جو دیگر سرکاری سرمایہ کاری منصوبوں کی شمولیت
کی بھی حوصلہ افزائی کرتی ہے۔دستاویز کے مطابق، سرکاری خریداری کے منصوبوں
کے لئے تعمیراتی سامان جس کی "لازمی" کے طور پر درجہ بندی کی گئی ہے، تمام
متعلقہ سبز مواد کے معیار کے مطابق خریدا اور استعمال کیا جانا چاہئے.
دریں اثنا ، "اختیاری" کے طور پر درجہ بند تعمیراتی مواد کے لئے ، منصوبوں
میں استعمال ہونے والے سبز مواد کا تناسب مجموعی کے 40 فیصد سے کم نہیں
ہونا چاہئے۔دستاویز میں کہا گیا ہے کہ اس میں شامل شہر اور ضلعی سطح کی
حکومتوں کو نئے صنعتی تعمیراتی طریقوں جیسے پری فیبریکیٹڈ اور اسمارٹ
ٹیکنالوجیز کو فروغ دینا چاہئے ، اور طویل مدتی میکانزم قائم کرنا چاہئے جو
تعمیراتی شعبے کی سبز اور کم کاربن تبدیلی کی حمایت کرتے ہیں۔دستاویز میں
میں کہا گیا ہے کہ محفوظ، آرام دہ، سبز اور سمارٹ گھروں کی تعمیر پر توجہ
مرکوز کی جانی چاہئے جبکہ قابل رہائش، سبز اور کم کاربن والے شہروں کو فروغ
دینا چاہئے۔
چائنا بلڈنگ میٹریل فیڈریشن کے اعداد و شمار کے مطابق نومبر 2024 تک ، چین
میں 5300 سے زیادہ تصدیق شدہ گرین بلڈنگ میٹریل انٹرپرائزز تھیں ، جبکہ اس
شعبے میں تصدیق شدہ سبز مصنوعات کی تعداد 12 ہزار سے تجاوز کر چکی ہیں۔
چین کی ان کوششوں کا حتمی مقصد موسمیاتی تبدیلی سے جڑے مسائل کا حل ہے۔ویسے
بھی چین کے آب و ہوا سے متعلق اقدامات اور ماحول دوست منتقلی کی کوششوں کے
مضبوط عزم نے قابل ذکر نتائج حاصل کیے ہیں ، جس سے ملک کی کم کاربن ترقی
میں تیزی آئی ہے اور عالمی سطح پر موسمیاتی تبدیلی کی تخفیف کی کوششوں میں
نمایاں کردار ادا کیا گیا ہے۔
چین نے اپنی معیشت اور معاشرے کی سبز اور کم کاربن تبدیلی کو مسلسل آگے
بڑھایا ہے، آلودگی کے خلاف جنگ میں اہم پیش رفت کی ہے، ماحولیاتی تحفظ اور
بحالی میں قابل ذکر پیش رفت حاصل کی ہے، اور ایک آسان، زیادہ پائیدار اور
ماحول دوست طرز زندگی کی جانب معاشرتی تبدیلی کو فروغ دیا ہے.
آج ،سبز ترقی چینی جدیدکاری کی ایک نمایاں خصوصیت بن گئی ہے۔ چین کی یہ
کوشش بھی ہے کہ اپنے ماحولیات کے اہداف کو پورا کرنے کی خاطر ملک بھر میں
مزید لو کاربن رہائشی کمیونٹیز کو فروغ دیا جائے۔ اس ضمن میں شہریوں میں
ماحول دوست تصورات کو بھرپور طور پر فروغ دیتے ہوئے اُن کی حوصلہ افزائی کی
جا رہی ہے کہ وہ کم کاربن زندگی اپنائیں۔اسی حوالے سے چین کی ہاؤسنگ اور
شہری و دیہی ترقی کے حکام نے باضابطہ ایک منصوبہ ترتیب دیا ہے جس کے تحت
2030 تک، تقریباً 60 فیصد شہری آبادیوں کو "گرین کمیونٹیز" میں ڈھالا جائے
گا اور شہریوں کو وہ تمام سہولیات اُن کی دہلیز تک پہنچائی جائیں گی جس سے
گرین طرز زندگی اختیار کرنے میں مدد مل سکے۔
|