|
بین الاقوامی مالیاتی فنڈ (آئی ایم ایف) اور عالمی بینک
دونوں نے حال ہی میں 2025 میں چین کی اقتصادی ترقی کے بارے میں اپنی پیش
گوئیوں میں اضافہ کیا ہے۔ چونکہ ، چین عالمی اقتصادی ترقی کا ایک بڑا انجن
ہے، لہذا یہ پیش رفت دنیا کے لیے بھی نہایت اہم ہے جو سست شرح نمو سے باہر
نکلنے کی خواہش مند ہے۔اسی طرح اعلیٰ معیار کی ترقی اور اعلیٰ معیار کا
کھلا پن غیر یقینی بیرونی ماحول اور سست عالمی معیشت کے تناظر میں چین کا
جواب ہے۔
بیرونی ماحول کے ساتھ ساتھ اگر اندرون ملک دیکھا جائے تو چینی معیشت کی
طاقت 1.4 بلین سے زائد افراد پر مشتمل صارفی مارکیٹ سے بڑھتی ہوئی اور اپ
گریڈنگ طلب میں مضمر ہے ، جو پیداوار اور فراہمی میں مسلسل تبدیلیوں اور اپ
گریڈ کی حوصلہ افزائی کرتی ہے۔موسم سرما کے کھیلوں سے لے کر برف کی سیاحت
تک ، چین دنیا کی دوسری سب سے بڑی معیشت کے طور پر ترقی کے نئے ڈرائیور
تخلیق کرنے کے لئے اپنے آئس اینڈ اسنو وسائل کو فعال طور پر استعمال کر رہا
ہے۔
آج ، ملک میں سیاحوں کی کثیر تعداد سرمائی سیاحت سے متعلق تفریحی اور
ثقافتی سرگرمیوں پر خرچ کرنے کے لئے زیادہ تیار نظر آتی ہے. سرمائی معیشت
کے لئے چین کے قومی بلیو پرنٹ کے مطابق ، توقع ہے کہ یہ صنعت 2030 تک
روزگار کو بڑھانے اور اعلیٰ معیار کی ترقی کو فروغ دینے میں بڑا کردار ادا
کرے گی اور سرمائی کھپت گھریلو طلب کے لئے ترقی کا ایک اہم محرک ہوگی۔
طلب ایک وسیع تصور ہے اور انفرادی اعتبار سے تنوع کی بھی عکاسی کرتا ہے۔
مثال کے طور پر ، عمر رسیدہ صارفین یومیہ ضروریات کا انتخاب کرتے وقت
اسمارٹ سلوشن اور صحت کی دیکھ بھال کی خصوصیات کو ترجیح دیتے ہیں۔ نوجوان
افراد ، جو سوشل پلیٹ فارم پر نئی مصنوعات کا اشتراک اور دریافت کرنے کے
خواہاں ہیں ، اکثر برانڈ کی قدر اور خریداری کے تجربے پر زیادہ توجہ مرکوز
کرتے ہوئے ذاتی ، اپنی مرضی کے مطابق تیار کردہ اشیاء کی تلاش کرتے ہیں۔
دوسری جانب ، آفس ورکرز عملی اشیاء کا انتخاب کرتے ہیں ، جیسے ورسٹائل پاور
آؤٹ لیٹس اور ملٹی فنکشنل اسٹوریج باکسز ، جو ان کے کام کے ماحول کے مطابق
ہیں اور تناؤ کو کم کرنے میں مدد کرتے ہیں۔
یوں کہا جا سکتا ہے کہ چین کی بڑے پیمانے پر صارفی منڈی نہ صرف انتہائی
وسیع عمومی طلب کا مظاہرہ کرتی ہے بلکہ متنوع انفرادی ضروریات کو بھی شامل
کرتی ہے۔ ان متنوع اور ذاتی مطالبات سے فائدہ اٹھاتے ہوئے ، بہت سی کمپنیاں
تکنیکی اور صنعتی جدت طرازی سے ہم آہنگ ہوتے ہوئے خود کو وسعت دینے اور
مضبوط بنانے میں کامیاب رہی ہیں۔
اسی طرح روزمرہ اشیاء کی کھپت نہ صرف لوگوں کی روزمرہ زندگی کے لئے ضروری
ہے بلکہ مائیکرو ، چھوٹے اور درمیانے درجے کے کاروباری اداروں ، سماجی
روزگار اور کارکنوں کی آمدنی کی ترقی کے لئے بھی اہم ہے۔ یہ کھپت معاشی
ترقی میں بھی کلیدی کردار ادا کرتی ہے۔تعلیم اور تربیت سے لے کر فٹنس اور
تفریح تک، اور صحت کی دیکھ بھال سے لے کر گھریلو خدمات تک، چھوٹی روزمرہ
ضروریات کی اشیاء خدمات کی ایک وسیع رینج کو پورا کرتی ہیں. چین میں روزمرہ
ضروریات کی بڑھتی ہوئی کھپت نے صارفین اور مینوفیکچررز دونوں کے لئے اہم
فوائد لائے ہیں۔
وسیع تر سطح پر، شہری اور دیہی رہائشیوں میں بڑھتی ہوئی کھپت کی طلب کے
وسیع رجحانات کو سمجھنا، شہریوں کی جانب سے بڑھتی ہوئی نئی طلب کے تقاضوں
کا بروقت ادراک ، کاروباری اداروں سے نئی مصنوعات کی فراہمی میں اضافہ
کرنا، اور طلب اور رسد کے درمیان اعلی سطحیٰ توازن برقرار رکھنا ، آج اور
کل دونوں کے لئے فائدہ مند ہے۔ وسیع تناظر میں کہا جا سکتا ہے کہ ، چین
گھریلو طلب کو بڑھانے کی حکمت عملی کو رسد کی ساختی اصلاحات کے ساتھ فعال
طور پر مربوط کر رہا ہے ، یہ ایک ایسا قدم ہے جس کے آئندہ عرصے میں دوررس
مثبت اثرات مرتب ہوں گے۔
|