“ عورت کی سب سے بڑی آزادی “
(Muhammad Jaffar Khunpouria, Karachi)
| “ مشرقی عورت کا وقار اور حیا ہی اس کی اصل آزادی ہے" |
|
|
عورت کی سب سے بڑی آزادی
محمد جعفر خونپوریہ
مغرب نے دنیا کو جو سب سے بڑا دھوکہ دیا ہے وہ ’’عورت کی آزادی‘‘ کے نام پر ہے ۔۔۔۔۔۔۔۔۔۔۔ یہ آزادی دراصل زنجیروں کا وہ جال ہے جس میں عورت کو جکڑ کر اس کی معصومیت، اس کی شرم و حیا اور اس کے تقدس کو روند ڈالا گیا ہے ۔۔۔۔۔۔۔۔۔۔ مغرب نے عورت کو کبھی ماں کے روپ میں نہیں دیکھا، کبھی بہن یا بیٹی کے تقدس میں نہیں سمجھا، بلکہ صرف ایک کھلونا، ایک دل بہلانے کی شے اور ایک سستی مزدور کے طور پر استعمال کیا ۔۔۔۔۔۔۔۔۔ یہ آزادی نہیں ہے، بلکہ غلامی کی جدید ترین شکل ہے، اور افسوس یہ ہے کہ دنیا کے دوسرے معاشرے بھی اس سراب کے پیچھے بھاگنے لگے ہیں
ذرا سوچئے، وہ مغرب جو آزادی اور حقوقِ نسواں کے نعرے لگاتا ہے، اس نے عورت کو کہاں لا کھڑا کیا ہے ۔۔۔۔۔۔۔۔۔۔۔ کبھی نیم عریاں اشتہارات میں بیچا جاتا ہے، کبھی فیشن شو کے ریمپ پر چلا دیا جاتا ہے، کبھی فلمی پردے پر نچوا دیا جاتا ہے، اور کبھی دفاتر کے کیبن میں مسکراہٹوں کے دام لگائے جاتے ہیں ۔۔۔۔۔۔۔۔۔۔ مغرب نے عورت کو ایک جنسِ بازار بنا دیا، یہ مساوات نہیں، یہ غلامی ہے؛ یہ عزت نہیں، یہ ذلت ہے
تاریخ شاہد ہے کہ دوسری جنگِ عظیم کے بعد مغرب کے کارخانوں میں مرد ختم ہو گئے تھے ۔۔۔۔۔۔۔۔۔۔ عورتوں کو کھینچ کر مشینوں کے آگے کھڑا کر دیا گیا ۔۔۔۔۔۔۔۔۔۔۔۔ وہاں سے عورت کی مزدوری کا آغاز ہوا ۔۔۔۔۔۔۔۔۔۔ مرد سپاہی بنے اور عورت مزدور ۔۔۔۔۔۔۔۔۔۔۔ مرد نے فتح کے تمغے لیے اور عورت نے پسینے کی قیمت بھی نہ پائی ۔۔۔۔۔۔۔۔۔۔۔۔۔ یہ وہ لمحہ تھا جب مغرب کے سرمایہ داروں کو اندازہ ہوا کہ عورت سب سے سستی لیبر ہے ۔۔۔۔۔۔۔۔۔۔۔۔ مرد کے مقابلے میں آدھی تنخواہ، زیادہ مشقت اور زبان کھولنے کی اجازت بھی نہیں ۔۔۔۔۔۔۔۔۔۔ یوں عورت کو آزادی کے نام پر استحصال کے شکنجے میں جکڑ دیا گیا
یہ عجیب مساوات ہے کہ مغرب کی فیکٹریوں میں عورت رات گئے تک کام کرے، سڑکوں پر نیم برہنہ اشتہارات میں مسکرائے، بارز اور کلبز میں جسم بیچے، اور پھر یہ کہا جائے کہ تم آزاد ہو ۔۔۔۔۔۔۔۔۔۔۔ یہ کیسی آزادی ہے جس میں عزت گروی رکھ کر، شرم کا سودا کر کے اور جسم کو پیکج بنا کر مارکیٹ میں کھڑا کر دیا گیا ۔۔۔۔۔۔۔۔۔۔۔۔ کیا یہ وہی عورت نہیں جسے فطرت نے اولاد کی پرورش کا شرف بخشا تھا ۔۔۔۔۔۔۔۔۔ جسے ماں بنا کر کائنات کو محبت دی گئی تھی ۔۔۔۔۔۔۔۔۔۔۔ لیکن مغرب نے اسے دودھ پلانے والی ماں کے بجاائے دودھ بیچنے والی کمپنی کی ماڈل بنا دیا
فطرت کی بات کریں تو ہر جگہ نر میں وجاہت اور خوبصورتی ہے ۔۔۔۔۔۔۔۔ مور کا پر، کبوتر کا انداز، شیر کی ہیبت، ہر جگہ نر اپنی شان کے ساتھ جلوہ گر ہے۔۔۔۔۔۔۔۔ لیکن مغرب نے عورت کو خوبصورتی کا معیار بنا کر اسے نیلام گھر میں کھڑا کر دیا ۔۔۔۔۔۔۔۔۔ عورت کی اصل خوبصورتی اس کی شرم ہے، اس کا وقار ہے، اس کی حیا ہے، لیکن آج اسے کپڑوں کی کمی اور جسم کی نمائش میں ڈھونڈا جا رہا ہے ۔۔۔۔۔۔۔۔۔۔۔ یہ سراسر فطرت کے خلاف بغاوت ہے
مغرب نے عورت کو یہ باور کرایا کہ وہ مرد کی برابری کرے ۔۔۔۔۔۔۔۔۔۔۔ لیکن برابری کا مطلب کیا ہے ۔۔۔۔۔۔۔۔۔۔۔۔۔ مرد سڑک پر مزدور بن کر پتھر اٹھاتا ہے، کیا عورت بھی یہ کرے تو وہ آزاد ہے ۔۔۔۔۔۔۔۔۔۔۔ مرد باربرداری کرتا ہے، کیا عورت بھی یہ کرے تو یہ مساوات ہے ۔۔۔۔۔۔۔۔۔۔۔۔ اصل حقیقت یہ ہے کہ عورت کو مرد کی برابری نہیں، بلکہ اپنی اصل پہچان دی گئی تھی ۔۔۔۔۔۔۔۔۔۔۔۔۔ وہ پہچان جس میں محبت ہے، وقار ہے، اولاد کی پرورش ہے اور خاندان کا استحکام ہے لیکن مغرب نے اسے ایک مصنوعی دوڑ میں دھکیل کر عورت سے اس کی شناخت چھین لی
آج کے مغرب میں عورت کے جسم کو سرمایہ داری کا سب سے بڑا ہتھیار بنا دیا گیا ہے ۔۔۔۔۔۔۔۔۔۔۔ اشتہارات دیکھ لیں، چاہے وہ کار کا ہو یا موبائل کا، بیچا عورت کے جسم کے ذریعے جا رہا ہے ۔۔۔۔۔۔۔۔۔۔۔۔ کپڑے عورت پہنے یا نہ پہنے، فروختگی کا ذریعہ عورت ہی ہے ۔۔۔۔۔۔۔۔ یہ کس کی جیت ہے ۔۔۔۔۔۔۔۔۔۔ سرمایہ دار کی، جو عورت کو استحصال کی آخری حد تک لے گیا ۔۔۔۔۔۔۔۔۔۔۔۔ عورت سمجھتی ہے کہ وہ آزاد ہے، مگر حقیقت یہ ہے کہ وہ اب تک کی سب سے بڑی غلام ہے
ذرا اس تلخ حقیقت کو محسوس کیجیے ۔۔۔۔۔۔۔۔۔۔۔۔ آج کی عورت آزادی کے نام پر اپنی شرم اور حیا نیلام کرتی ہے ۔۔۔۔۔۔۔۔۔۔۔۔۔ وہ سمجتی ہے کہ گھر کی چار دیواری سے نکل کر دفتر میں آنا ترقی ہے، لیکن حقیقت میں وہ اپنے وقار کی قیمت ادا کر کے سرمایہ دار کے منافع کو بڑھا رہی ہے ۔۔۔۔۔۔۔۔۔۔۔ وہ سمجتی ہے کہ پردے سے نکل کر ریمپ پر آنا آزادی ہے، لیکن حقیقت میں وہ اپنے بدن کو نیلام کر کے سرمایہ دار کی تجوری بھر رہی ہے ۔۔۔۔۔۔۔۔۔۔۔۔ یہ آزادی نہیں، یہ غلامی ہے؛ اور اس غلامی کو اتنا خوبصورت لبادہ پہنایا گیا ہے کہ عورت خود بھی اس دھوکے میں جی رہی ہے
مغرب نے عورت کو حقوق کے نام پر حقوق سے محروم کر دیا ۔۔۔۔۔۔۔۔۔۔۔ مرد آج بھی مالک ہے، اور عورت آج بھی مزدور ہے ۔۔۔۔۔۔۔۔۔۔۔ فرق صرف یہ ہے کہ غلامی کی زنجیر اب سونے کی ہوگئی ہے ۔۔۔۔۔۔۔۔۔۔۔۔ وہ زنجیر جسے عورت آزادی سمجھ کر پہن رہی ہے
یہ سب مغرب کے مرد نے اپنی عورت کے ساتھ کیا ہے ۔۔۔۔۔۔۔۔۔۔۔۔ اُس نے آزادی کے نام پر اپنی عورت کو کھیتوں، کارخانوں اور دفتروں میں دھکیل دیا اُس نے اُسے گھر کی ملکہ سے کھینچ کر سستی مزدور بنا دیا ۔۔۔۔۔۔۔۔۔۔ مغربی مرد نے عورت کے وجود کو اشتہاروں کی زینت، بازار کی رونق اور سیاست کے کھیل کا مہرہ بنا ڈالا ۔۔۔۔۔۔۔۔۔۔۔۔ اُس نے اُسے مادرِ علم و ادب نہیں، بلکہ بازار کا سامان بنا کر رکھ دیا ۔۔۔۔۔۔۔۔۔۔۔۔ اور پھر دنیا کو یہ کہانی سنا دی کہ یہی آزادی ہے ۔۔۔۔۔۔۔۔۔۔۔ مگر یہ آزادی نہیں، یہ غلامی کی نئی شکل ہے ۔۔۔۔۔۔۔۔۔۔۔ عورت اپنی شرم و حیا، اپنی عزت و وقار بیچ کر چند سکوں کی اجرت لے رہی ہے اور سمجھتی ہے کہ وہ آزاد ہے ۔۔۔۔۔۔۔۔۔۔۔۔ لیکن سوال یہ ہے کہ مشرقی عورت کو کیا ہوا ہے ۔۔۔۔۔۔۔۔۔۔۔۔۔ وہ عورت جس کی آنکھوں میں حیا کی جھلک صدیوں تک مشرق کی پہچان رہی ۔۔۔۔۔۔۔۔۔۔ وہ عورت جو پردے کو اپنی ڈھال اور وقار کو اپنی شناخت سمجھتی تھی ۔۔۔۔۔۔۔۔۔۔۔ وہ عورت جو ماں تھی تو تقدیس کا آئینہ تھی، بہن تھی تو عزت کی علامت تھی، بیٹی تھی تو اللہ کی رحمت تھی، بیوی تھی تو وفا اور سکون کا سامان تھی ۔۔۔۔۔۔۔۔۔۔۔ آج وہ کیوں مغرب کی اندھی تقلید میں بھاگ رہی ہے
کیا مشرقی عورت بھول گئی ہے کہ اُس کا سب سے بڑا ہتھیار اُس کی شرم و حیا ہے ۔۔۔۔۔۔۔۔۔۔۔۔ یہی شرم اُس کی زینت ہے اور یہی حیاء اُس کا زیور ہے ۔۔۔۔۔۔۔۔۔۔۔ مگر مغرب کی رنگین دنیا نے اُس کے دل میں یہ وسوسہ ڈال دیا ہے کہ حیا کمزوری ہے، پردہ قید ہے، اور مشرقی روایات زنجیریں ہیں ۔۔۔۔۔۔۔۔۔۔ حالانکہ حقیقت یہ ہے کہ یہی روایات اُس کی عزت کا قلعہ اور اُس کی عظمت کی ضمانت ہیں
مشرقی مرد نے اپنی عورت کو ہمیشہ بچانے کی کوشش کی ہے ۔۔۔۔۔۔۔۔۔۔۔۔ اُس نے اُسے گھر کے اندر تقدیس کا درجہ دیا، محفلوں میں احترام بخشا، اور خاندان کے نظام میں مرکزی مقام دیا ۔۔۔۔۔۔۔۔۔۔۔۔ مگر آج مشرقی عورت مغرب کی عورت کو دیکھ کر یہ سوچنے لگی ہے کہ شاید یہی آزادی ہے کہ وہ گھر سے نکل کر دفتر کی کرسی پر جا بیٹھے، یا اسکرین پر ناچ کر تماش بینوں کو خوش کرے کیا یہ وہی عورت ہے جسے کبھی "مشرق کا حسن" کہا جاتا تھا
مغرب کی عورت نے اپنی آزادی کی قیمت اپنی نسوانیت کھو کر چکائی ہے ۔۔۔۔۔۔۔۔۔۔۔۔ اُس نے اپنی ممتا قربان کی، اپنی عصمت بیچ ڈالی، اور اپنی نسلوں کو غیرت سے محروم کر دیا ۔۔۔۔۔۔۔۔۔۔ آج مغرب میں گھر اجڑ رہے ہیں، بچے ماں باپ کے سائے سے محروم ہیں، رشتے ٹوٹ پھوٹ کا شکار ہیں، اور عورت ایک تنہا وجود کی صورت میں سڑکوں پر بھٹک رہی ہے ۔۔۔۔۔۔۔۔۔۔۔ یہ سب اُس آزادی کا نتیجہ ہے جس کے پیچھے مشرقی عورت بھی اندھی تقلید میں دوڑ رہی ہے
مگر مشرقی عورت کو یہ نہیں بھولنا چاہیے کہ دنیا اُسے اُس کی حیا اور اُس کی شرم کی وجہ سے جانتی ہے ۔۔۔۔۔۔۔۔۔۔۔۔ یہ وہ عورت ہے جو چادر اوڑھ کر نکلتی ہے تو معاشرہ جھک کر اُس کا استقبال کرتا ہے ۔۔۔۔۔۔۔۔۔۔۔۔ یہ وہ عورت ہے جو گھر میں رہتی ہے تو اُس کی خاموشی بھی خاندان کے سکون کی ضمانت بنتی ہے ۔۔۔۔۔۔۔۔۔۔۔۔ یہ وہ عورت ہے جو اگر ماں ہے تو اپنے بچے کے دل میں ایمان، محبت اور اخلاق کی بنیاد ڈالتی ہے ۔۔۔۔۔۔۔۔۔۔۔۔۔۔۔ یہ وہ عورت ہے جو اگر بیٹی ہے تو باپ کی ڈھال اور ماں کی آنکھوں کا نور ہے ۔۔۔۔۔۔۔۔۔۔۔۔۔ یہ وہ عورت ہے جو اگر بہن ہے تو بھائی کے لیے غیرت اور حفاظت کا استعارہ ہے ۔۔۔۔۔۔۔۔۔۔۔ اور اگر بیوی ہے تو شوہر کے لیے سکون اور زندگی کا سرمایہ ہے
اے مشرقی عورت ۔۔۔۔۔۔۔۔۔۔۔۔۔۔ تم مشرق کی روح ہو، تم مشرق کا حسن ہو، تم مشرق کی خوشبو ہو ۔۔۔۔۔۔۔۔۔۔۔۔۔ تمہارے بغیر مشرق میں اندھیرا ہے ۔۔۔۔۔۔۔۔۔ تم ماں بن کر نسلوں کو جنت کی خوشبو دیتی ہو ۔۔۔۔۔۔۔۔۔۔۔۔۔ تم بہن بن کر غیرت کا چراغ جلاتی ہو ۔۔۔۔۔۔۔۔۔۔۔۔۔۔ تم بیٹی بن کر والدین کے دل کو سکون بخشتی ہو ۔۔۔۔۔۔۔۔۔۔۔۔۔ تم بیوی بن کر خاندان کو جنت کا نقشہ عطا کرتی ہو ۔۔۔۔۔۔۔۔۔۔۔ تم وہی ہو جس کے دم سے گھر آباد ہوتے ہیں، خاندان پروان چڑھتے ہیں اور معاشرے سکون پاتے ہیں
مگر اگر تم مغرب کی اندھی تقلید میں بہک گئیں تو یاد رکھو کہ نہ صرف اپنی ذات کو برباد کرو گی بلکہ اپنی نسلوں کو بھی تباہی کی کھائی میں دھکیل دو گی ۔۔۔۔۔۔۔۔۔۔۔۔ مغرب کی عورت نے یہ راستہ اپنایا اور آج اُس کے پاس نہ خاندان ہے، نہ محبت ہے، نہ سکون ہے ۔۔۔۔۔۔۔۔۔۔۔۔ اگر کچھ ہے تو صرف تنہائی ہے، غلامی ہے اور دکھ ہے
اس لیے اے مشرقی عورت ۔۔۔۔۔۔۔۔۔۔ اپنی پہچان یاد رکھو ۔۔۔۔۔۔۔۔۔ اپنی شرم کو اپنی زینت اور اپنی حیا کو اپنا زیور بنا لو ۔۔۔۔۔۔۔۔۔۔۔ دنیا تمہیں مشرق کے حسن کے طور پر سلام کرے گی، تمہیں عزت دے گی اور تمہیں وقار کے ساتھ پہچانے گی ۔۔۔۔۔۔۔۔۔۔۔ آزادی کے نام پر غلامی کے جال میں نہ پھنسو ۔۔۔۔۔۔۔۔۔ تم وہ ہو جسے اللہ نے تقدیس دی ہے، عزت دی ہے اور رحمت بنایا ہے ۔۔۔۔۔۔۔۔۔۔۔ تم مشرق کا حسن ہو، اور یہی تمہاری سب سے بڑی آزادی ہے
٭٭٭٭٭٭٭٭٭٭
|
|