معاشی ترقی میں موسمی وسائل کا کردار
(Shahid Afraz Khan, Beijing)
|
معاشی ترقی میں موسمی وسائل کا کردار
تحریر: شاہد افراز خان ،بیجنگ
دنیا بھر میں موسمیاتی تبدیلی کے بڑھتے ہوئے اثرات نے معیشت، ماحول اور سماجی نظم و نسق کو ایک نئے مرحلے میں داخل کر دیا ہے، جہاں قدرتی وسائل کے مؤثر اور سائنسی استعمال کو پائیدار ترقی کی بنیاد سمجھا جا رہا ہے۔ اسی تناظر میں چین میں موسمی وسائل کو ایک باقاعدہ معاشی عنصر کے طور پر جانچنے اور بروئے کار لانے کی کوششیں تیز ہو گئی ہیں۔ چین کے محکمہ موسمیات کی جانب سے موسمی وسائل کی معیشت پر پہلی بلیو بک کا اجراء اسی سمت میں ایک اہم پیش رفت قرار دیا جا رہا ہے، جس میں مختلف شعبوں میں موسمی وسائل کے استعمال، اثرات اور امکانات کا جامع جائزہ پیش کیا گیا ہے۔
اس بلیو بک میں واضح کیا گیا ہے کہ عالمی موسمیاتی تبدیلی کے تناظر میں موسمی وسائل اب محض قدرتی مظاہر نہیں رہے بلکہ پائیدار معاشی اور سماجی ترقی کے ایک کلیدی عنصر کے طور پر ابھر کر سامنے آئے ہیں۔ رپورٹ کے مطابق موسمی حالات، درجہ حرارت، بارش، ہوا اور شمسی توانائی جیسے عناصر کو سائنسی بنیادوں پر استعمال کر کے نہ صرف پیداوار میں اضافہ ممکن ہے بلکہ ماحولیاتی توازن اور کم کاربن ترقی کے اہداف بھی حاصل کیے جا سکتے ہیں۔
یہ بلیو بک زراعت، توانائی، صحت، سیاحت اور کم کاربن ترقی سمیت متعدد شعبوں پر مرکوز ہے اور موسمی وسائل کی معاشی تبدیلی کے مختلف راستوں اور نتائج کا کثیرالجہتی تجزیہ پیش کرتی ہے۔ زراعت کے شعبے میں موسمی وسائل کے سائنسی جائزوں کو غذائی تحفظ کے لیے نہایت اہم قرار دیا گیا ہے۔ رپورٹ میں بتایا گیا ہے کہ موسمی حالات میں تبدیلی اور بہتر زرعی منصوبہ بندی کے نتیجے میں شمال مشرقی چین میں مکئی کی کاشت کا دائرہ تقریباً اکتالیس لاکھ ہیکٹرز تک شمال کی جانب پھیل چکا ہے، جو زرعی پیداوار میں اضافے اور غذائی سلامتی کے لیے ایک مثبت پیش رفت سمجھی جا رہی ہے۔
توانائی کے شعبے میں بلیو بک اس امر کی نشاندہی کرتی ہے کہ ہوا اور شمسی توانائی کی پیداوار کے لیے موسمی پیشین گوئی کی درستگی میں بہتری سے قدرتی آفات کے باعث ہونے والے نقصانات میں کمی لائی جا سکتی ہے۔ اس کے ساتھ ساتھ بجلی کے قومی گرڈ کی مؤثر منصوبہ بندی اور ترسیل کو بہتر بنایا جا سکتا ہے، جس سے توانائی کے ضیاع میں کمی اور نظام کی مجموعی کارکردگی میں اضافہ ممکن ہوتا ہے۔ رپورٹ کے مطابق موسمی ڈیٹا پر مبنی جدید ٹیکنالوجی توانائی کے شعبے میں فیصلہ سازی کے عمل کو مزید مضبوط بنا رہی ہے۔
سیاحت کے میدان میں بھی موسمی وسائل کو معاشی ترقی کا ایک نیا ذریعہ قرار دیا گیا ہے۔ بلیو بک میں بتایا گیا ہے کہ بعض علاقوں میں موسمی مناظر، جیسے بادلوں کے سمندر، سورج طلوع ہونے کے قدرتی نظارے اور مخصوص موسمی کیفیات، مقامی سیاحت کو فروغ دینے کا باعث بن رہی ہیں۔ ان قدرتی مظاہر کو باقاعدہ منصوبہ بندی کے تحت سیاحتی مصنوعات میں ڈھال کر مقامی معیشت کو نئی تحریک دی جا رہی ہے، جس سے روزگار کے مواقع بھی پیدا ہو رہے ہیں۔
بلیو بک میں کم کاربن ترقی اور ماحولیاتی تہذیب کے فروغ کے لیے موسمی وسائل کے مؤثر استعمال کو بنیادی حیثیت دی گئی ہے۔ رپورٹ کے مطابق موسمی ڈیٹا اور سائنسی تحقیق چین کےتخفیف کاربن اخراج کے حوالے سے کاربن پیک اور بالآخر کاربن نیوٹرل کے اہداف کے حصول میں معاون ثابت ہو سکتی ہے۔ اس ضمن میں موسمی وسائل کے درست تخمینے اور ان کے نظم و نسق کو پالیسی سازی کا اہم حصہ قرار دیا گیا ہے۔
مزید برآں، یہ بلیو بک تحقیق، حکومتی فیصلوں، صنعتی جدت اور موسمیاتی حکمرانی کے لیے ایک سائنسی حوالہ فراہم کرتی ہے۔ رپورٹ میں اس بات پر زور دیا گیا ہے کہ موسمی وسائل سے متعلق معلومات کو مختلف شعبوں میں مربوط انداز میں استعمال کر کے نہ صرف معاشی فوائد حاصل کیے جا سکتے ہیں بلکہ ماحولیاتی خطرات سے نمٹنے کی صلاحیت بھی بہتر بنائی جا سکتی ہے۔
مجموعی طور پر موسمی وسائل کی معیشت پر چین کی پہلی بلیو بک اس حقیقت کی عکاس ہے کہ مستقبل کی ترقی کا انحصار قدرتی وسائل کے سائنسی، محتاط اور پائیدار استعمال پر ہے۔ بدلتے ہوئے موسمی حالات کے دور میں ایسی تحقیقی کاوشیں نہ صرف قومی سطح پر منصوبہ بندی کو مضبوط بناتی ہیں بلکہ عالمی سطح پر موسمیاتی چیلنجز سے نمٹنے کے لیے بھی ایک عملی مثال پیش کرتی ہیں۔ موسمی وسائل کو ترقی کے ایک متوازن اور ذمہ دار راستے پر بروئے کار لانا آئندہ برسوں میں معاشی استحکام اور ماحولیاتی تحفظ کے لیے ناگزیر سمجھا جا رہا ہے۔ |
|