| حالیہ برسوں کے روران عالمی سطح
پرہم جنسی پرستی کا بڑھتا ہوا رجحان محسوس کیا جارہا ہے جبکہ دہلی ہائی
کورٹ کے ذریعے2 جولائی2009کو ہم جنس پرستی کو قانونی قرار دینے کے
بعدہندوستان میں خاص طور سے اس جانب رغبت پیدا ہوئی ہے جس کے تحت نہ صرف اس
موضوع پر ماہانہ رسالہ’تفریح‘ جاری ہوا بلکہ فلم ’دوستانہ‘ بھی منظر عام پر
آئی۔ہم جنس پرسوں اور خواجہ سراؤں کی حمایت میں رنگین لباس زیب تن کئے
سینکڑوں افراد اتوار کونئی دہلی کی سڑکوں پر اترے اور اس فرقہ کے خلاف
امتیازی سلوک کو ختم کرنے کا مطالبہ کیا۔ بارہ کھمبا روڈ سے جنتر منتر تک
نکالے گئے موم بتی لائٹ مارچ میں ہم جنس پرست اور ان کے حامی رنگ برنگے
مصنوعی چہرے لگا کر اور جھنڈے لے کر چل رہے تھے۔دہلی ہم جنس پریڈ 2011 کے
چوتھے ایڈیشن کے طور پر پریڈ نکالی گئی۔ حامیوں نے ڈرموں اور ڈھولکوں کی
تھاپوں پر رقص بھی کیا۔ دہلی کویر پرائڈ کمیٹی کے رکن راہل شرما نے کہا کہ
یہ احتجاجی مارچ نہیں بلکہ جشن کا مارچ ہے۔دریں اثناءعالمی سطح پرکئی برسوں
کے بعدبالآخر دنیا کے113 ممالک نے ہم جنس پرستی کی حقیقت کو کلی طور پر
تسلیم کرتے ہوئے اسے قانونی طور پر جائز قرار دے دیا ہے جب کہ76 ممالک نے
اس کو نامنظور کرتے ہوئے غیرقانونی قرار دیا ہے۔ ایران، سعودی عرب،
ماریطانیہ، یمن اور سوڈان میں تو اس فعل کے مرتکب افراد کو سزائے موت دی
جاتی ہے تاہم مالی، اردن، انڈونیشیا، قازغستان، ترکی، تاجکستان، کرغزستان،
بوسنیا ہرزے گوینا اور آذربائیجان وہ مسلم ممالک ہیں جہاں ہم جنس پرستی کو
قانونی طور پر جائز قرار دے دیا گیا ہے۔26 جون2011کو اسلام آباد کے امریکی
سفارت خانے میں مردوں اور خواتین ہم جنس پرستوں کی منعقدہ تقریب پر پاکستان
کے مذہبی حلقوں اور اراکین پارلیمنٹ نے شدید غم و غصے کا اظہار کیا۔ 31
مئی2011کو امریکی صدر کی تقریر میں سب کے لئے جنس و صنف سے بالاتر ہو کر
مساوی حقوق کا اعلان کیا گیا تھا۔ ہم جنس پرستی کے بارے میں معلومات اور
حقائق اقوام متحدہ کی مختلف دستاویزات سے حاصل کئے گئے ہیں۔ اس سلسلے میں
شائع ہونے والی ایک حالیہ رپورٹ میں انکشاف کیا گیا ہے کہ جنوبی صومالیہ
اور نائیجریا کی12 ریاستوں میں ہم جنس پرستوں کو موت کے گھاٹ اتار دیا جاتا
ہے۔ ماضی میں افغانستان میں طالبان کے دورحکومت اور 2001میں صدام حسین نے
عراق میں ایک حکم کے ذریعے ہم جنس پرستوں کے لئے سزائے موت تجویز کی تھی۔
سوڈان میں اگر کوئی فرد تین مرتبہ اس فعل کا مرتکب پایا جائے تو اسے یا تو
سنگسار کیا جاتا ہے یا پھر عمر قید کی سزا دی جاتی ہے۔ بہرکیف سوڈان میں
پہلی یا دوسری مرتبہ ہم جنسی کے فعل پر زیادہ سے زیادہ پانچ سال قید اور
100 کوڑوں کی سزا تجویز کی جاتی ہے۔ ایران دنیا کا وہ واحد ملک ہے جس نے
اپنے شہریوں کو ہم جنس پرستی کے ارتکاب پر سب سے زیادہ سزائیں دی ہیں۔
اسلامی انقلاب کے بعد ایرانی حکومت نے چار ہزار ہم جنس پرستوں کو موت کی
سزا سنائی ہے۔ انٹرنیشنل لیزبین، گے، بائی سیکسوئل، ٹرانس اور انٹر سیکس
ایسوسی ایشن کا پتہ 1978میں ہوا اب تک110 ممالک کی 700 تنظیمیں اس کی رکنیت
حاصل کر چکی ہیں۔ تنظیم کی انتھک کوششوں کے بعد اسے اس وقت کامیابی حاصل
ہوئی جب18 دسمبر2008کو اقوام متحدہ کی جنرل اسمبلی نے66 ممالک کے تعاون سے
گے اور لیزبین افراد کے حقوق کو تسلیم کیا۔ 19 ویں صدی کے آخر تک تمام مغرب
میں ایسی آوازیں بلند ہونا شروع ہو گئی تھیں جن کا مقصد ہم جنس پرستوں کے
حقوق کو تسلیم کرنا تھا اور ان کے حقوق مثال کے طور پر شادی، اولاد کی
تحویل کا حق، روزگار اور صحت سے متعلق تحریکوں کا آغاز ہو چکا تھا۔ دو سال
قبل امریکی حکومت کے دستخطوں کے ساتھ2009میں67 ممالک کے تعاون سے اقوام
متحدہ نے ایک اعلامیہ جاری کیا۔ اس دستاویز پر تمام یوروپی اور مغربی اقوام
نے اپنے دستخط ثبت کئے تاہم دوسری جانب57 مسلمان ممالک نے اقوام متحدہ کے
اس اعلامیے کے خلاف اعتراضی بیانات بھی داخل کئے۔ اس سال تقریباً 85 ممالک
نے اقوام متحدہ کی انسانی حقوق کی کونسل کے روبرو ہم جنس پرستی کے مرتکب
افراد کو سزائیں دیئے جانے کی پرزور مذمت کی ۔ ہم جنس پرست عورتوں کے لئے
’لیزبین‘ اور مردوں کے لئے ’گے‘ کی خاص اصطلاحات رائج ہیں حالانکہ ’گے‘ عام
طور پر ہم جنس پرست مردوں اور عورتوں دونوں کے لئے استعمال ہوتا ہے جبکہ
امریکہ میں2003کے دوران ہم جنس پرستی کو قانونی قرار دے دیا گیا تھا تاہم
امریکہ نے ہم جنس پرست مردوں پر اس بات کی پابندی عائد کر رکھی ہے کہ وہ
اپنا خون بطور عطیہ نہیں دے سکتے کیونکہ ان میں ایڈز لاحق ہونے کے خطرات
موجود ہوتے ہیں ۔برطانیہ اور بیشتر یوروپی ممالک میں بھی ہم جنس پرست افراد
اپنا خون عطیہ نہیں کر سکتے۔افریقہ کے38 ممالک میں ایسے قوانین موجود ہیں
جو ہم جنس پرستی کو ایک جرم تصور کرتے ہیں جبکہ بعض ممالک میں اس کی سزا
موت ہے اور بعض ملکوں میں سزائے قید دی جاتی ہے۔ ایشیا میں23 ممالک ایسے
ہیں جہاں ہم جنس پرستی کو ایک جرم سمجھا جاتا ہے۔ ان ممالک میں سے4 ایسے
ہیں جہاں اس جرم کی سزا موت ہے۔بہرنوع سماجی سائنس اور کردار کے علوم کے
ماہرین کا کہنا ہے کہ ہم جنس پرستی انسانوں کے جنسی عمل کا ہی ایک نارمل
اور مثبت اظہار ہے ۔ورلڈ ہیلتھ آرگنائزیشن جس نے ہم جنس پرستی کو ایک ذہنی
خلل اور عارضہ قرار دے رکھا تھا 1977میں اپنا یہ اعتراض واپس لے لیا۔ چین
نے بھی2001میں اسے ایک ذہنی بیماری تصور کرنے سے انکار کر دیا۔ بہرنوع تمام
آسمانی مذاہب نے جن میں اسلام، عیسائیت اور یہودیت شامل ہیں، لواطت کی شدید
مخالفت کی ہے اور اسے ایک ایسا گناہ قرار دیا ہے جو قدرت کے فطری نظام اور
اصولوں کے خلاف ہے۔ |