نوجوان فیس بک سے ناراض ہوگئے

مارک ذیربرگ امریکی کمپیوٹر ،انٹرنیٹ ماہر ہیں۔انکی شہرت فیس بک کے بانیوں کے طور پر ہے۔اپریل 2013 میں وہ فیس بک کے سربراہ اور چیف ایگزیکیوٹیو بن گئے اور اب انکی ذاتی دولت کا اندازہ 16.8بلین امریکی ڈالر لگایا گیاہے۔ شوشل میڈیاکے حوالے سے مشہور فیس بک کا آغاز فروری سنہ 2004 میں امریکی طالبعلم مارک زکربرگ اور اس کے ساتھیوں نے کیا تھا اور آج دنیا بھر میں اس کے ایک ارب کے لگ بھگ صارفین ہیں۔ مارک زکربرگ اس وقت ہارورڈ یونیورسٹی کے طالبعلم تھا اور اس نے یہ سہولت اپنے ہاسٹل کے کمرے سے اپنے چند دوستوں کی مدد سے شروع کی تھی اور اس کا مقصد ایک دوسرے کو بہتر طریقے سے جاننے کے سلسلے میں طلباکی مدد کرنا تھا۔اس کے آغاز کے چوبیس گھنٹے کے اندر ہارورڈ کے بارہ سو طلبا اس پر اندراج ہوگئے تھے اور جلد ہی یہ جال دیگر کالجوں اور یونیورسٹیوں تک پھیل گیا۔ سنہ 2005 کے آخر میں فیس بک کو برطانیہ میں متعارف کروایا گیا اور آج فیس بک کی سہولت دنیا کی ستر سے زیادہ زبانوں میں موجود ہے۔سماجی ویب سائٹس کی بات کی جائے تو بے شک فیس بک معروف ترین سوشل نیٹ ورکنگ سائٹ ہے۔ تاہم اب نوجوانوں کی ایک بڑی تعداد فیس بک کو استعمال نہیں کر رہی۔ یا یوں بھی کہا جا سکتا ہے کہ فیس بک کے صارفین کی تعداد کم ہو رہی ہے۔ جس سے اس کے مالکان پریشان دکھائی دیتے ہیں۔ فیس بک پر نوجوان صارفین کے رجحانات پر تحقیق کرنے والے ماہرین کا کہنا ہے کہ فیس بک اب بدل چکا ہے۔ ان کا مطلب ہے کہ نوجوان اب فیس بک کو زیادہ استعمال نہیں کر رہے۔ ان کا کہنا ہے کہ 2013ء میں فیس بک کو ایک مسئلے کا سامنا رہا ہے، وہ یہ کہ 35 سال سے کم عمر کے بہت سے افراد نے فیس بک چھوڑ کر دوسرے سوشل میڈیا پلیٹ فارمز کا انتخاب کر لیا ہے۔ برلن کے انسٹیٹیوٹ برائے کمیونیکیشن اینڈ سوشل میڈیا سے منسلک کارسٹن وینسلاف Karsten Wenzlaff کہتے ہیں کہ ابھی تک دیگر سماجی نیٹ ورکس کے مقابلے میں فیس بک انتہائی مضبوط تھا۔ وہ کہتے ہیں ’’سماجی ویب سائٹس کا اصل مقصد دوستوں اور جاننے والوں سے رابطے میں رہنا ہے۔ لیکن اب موبائل ٹیلیفون میں بھی وَٹس ایپ یا اسی طرح کی کئی دیگر ایپلیکیشنز آ گئی ہیں، جو یہ کام کرتی ہیں۔ صرف یہ ایپس ڈاؤن لوڈ کر لیں اور ٹیلیفون میں موجود تمام نمبر خود بخود اس ایپ میں منتقل ہو جاتے ہیں۔‘‘