دنیا کے قدیم ترین شکاری

بیس لاکھ سال قبل ہمارا گزر بسر شکار ہی پر ہوتا تھا۔ رفتہ رفتہ بڑھتی ہوئی آبادی اور ان کی غذائی ضروریات پوری کرتے ہوئے انسان نے اپنے بنیادی جبلی تقاضے ’’بقا‘‘ کے پیش نظر خوراک حاصل کرنے کے نئے طریقے اختیار کیے۔ اس میں سب سے پہلے اس نے خود پودے کاشت کرنے اور جانور پالنے کا آغاز کیا، جسے علم بشریات کے ماہرین انسانی سماج کی تنظیم نو سے تعبیر کرتے ہیں۔ زراعت کی اس ابتدائی شکل کے قدم بہ قدم آبادی میں مزید اضافہ ہوا اور اس فن میں مہارت حاصل کرنے والی ’’زرعی سوسائٹی‘‘ نے شکار کے ’’قدیم‘‘ طریقے سے غذا حاصل کرنے والوں کو یا تو نقل مکانی پر مجبور کردیا یا پھر انھیں تباہ و برباد کر ڈالا۔ زراعت کا ہنر سیکھتے ہی انسان نے دیہات بسانا شروع کیے جو آگے چل کر بڑے شہروں اور پھر بڑی اقوام میں تبدیل ہوئے۔ اس طرح قدرے مختصر عرصے میں ’’شکاریوں‘‘ کا طرز زندگی قریباً ناپید ہوگیا۔ آج بھی صرف شکار کے ذریعے گزر بسر کرنے والے انسانی گروہ یا قبائل ایمازون، آرکٹک، اور کچھ افریقی خطے میں پاپونیوگنیا کی ریاست میں موجود ہیں۔ لیکن ان میں سب سے زیادہ توجہ ’’ہازا‘‘ افراد کو حاصل ہوئی۔

شمال وسطی تنزانیہ میں معروف ’’رفٹ ویلی‘‘ کے بیچوں بیچ ایاسی جھیل کے کنارے بسنے والا ایک ہزار افراد پر مشتمل یہ گروہ علم بشریات کے ماہرین کے نزدیک زندہ رکازات یا Living Fosile کا درجہ رکھتے ہیں، اس علاقے کو ہازالینڈ بھی کہا جاتا ہے۔ ان کی زبان کو بھی ہازا ہی کہا جاتا ہے۔ ابتداً ماہرین لسانیات ہازا بولی کو افریقی زبانوں کی کھوئسان فیملی میں شمار کرتے تھے لیکن جدید تحقیق کے مطابق یہ ایفروایشائی قدیم زبانوں کے کشٹک خاندان سے تعلق رکھتی ہے اس کے بعض الفاظ قدیم شکاریوں کی ناپید ہوچکی زبان ’’کوادزا‘‘ سے بھی ملتے جلتے ہیں۔ ہازا افراد اپنی زبان لکھتے نہیں ، لیکن ان کے ہاں قدیم قصے اور اساطیر سینہ بہ سینہ منتقل ہوئے ہیں۔ اپنے اس قدیم مسکن میں رہنے والے ہازا افراد کی تعداد اب صرف ہزار نفوس تک محدود ہوچکی ہے۔ ان میں سے کچھ قریبی دیہات میں کام تلاش کرنے کے لیے جا چکے ہیں اور بعض نے سیاحوں کو جدید دنیا میں قدیم حیات کی ان چلتی پھرتی باقیات سے متعارف کروانے کے لیے گائیڈ کا پیشہ اختیار کرلیا ہے۔ لیکن آج بھی ایک چوتھائی ہازا افراد شکار ہی کے ذریعے خوراک حاصل کرنے کے طریقے پر کاربند ہیں۔
 

یہ فصلیں نہیں اگاتے، جانور نہیں پالتے اور نہ ہی گھر بناتے ہیں۔ ان کا طرز زندگی رفٹ ویلی کے شمالی علاقے سے ملنے والی قدیم ترین انسانی باقیات سے معلوم ہونے والے طرز حیات سے بہت مماثلت رکھتا ہے۔ مختلف جینیاتی تجربات سے یہ معلوم ہوا ہے کہ ہازا افراد ابتدائی نسل انسانی کے نمائندہ ہیں اور اس کی واضح شہادت آج سے دس ہزار برس قدیم کے ان کے طرز حیات سے ملتی ہے۔ ہزاروں برس سے قدیم انسانی ورثے کو سنبھالے رکھنے والے یہ افراد اپنی اسی ’’ثابت قدمی‘‘ کی وجہ سے دنیا میں باقی بہت سے قدیم انسانی گروہوں اور قبائل سے مختلف ہیں اور اسی وجہ سے تحقیق کاروں کی توجہ کا مرکز ہیں۔

فلوریڈا اسٹیٹ یونیورسٹی میں اینتھروپولوجی کے پروفیسر اور دو دہائیوں سے ہازا افراد پر تحقیق میں مصروف فرینک مارلو کا کہنا ہے ’’ وقت ان کے لیے رکا نہیں لیکن انھوں نے اپنے ارد گرد زراعت اختیار کرنے والے گروپس کے باوجود غذا تلاش کرنے کے قدیم روایتی طریقوں کو برقرار رکھا ہے، اس لیے یہ کہا جاسکتا ہے کہ ممکنہ طور پر قرن ہا قرن گزرنے کے باوجود ان کی زندگیوں میں بہت کم تبدیلیاں واقع ہوئی ہیں۔‘‘ تعجب کی بات ہے کہ شکاری ہونے کے باوجود آج تک ہازا کبھی اپنے آس پاس بسنے والوں سے نہیں لڑے۔ ان کی آبادی کبھی بھی اتنی گنجان نہیں ہوئی کہ جس کے باعث کوئی متعدی مرض پھیلے اور نہ ہی اس بات کے شواہد ملتے ہیں کہ یہ کبھی قحط سالی کا شکار ہوئے ہوں۔ اس کے برعکس اس بات کے ثبوت ملتے ہیں کہ ان کے اطراف میں آباد زراعت کے جدید ذریعے سے خوراک حاصل کرنے والے کئی گروہ فصل کی تباہی یا غذائی قلت کے باعث کچھ عرصہ ان کے ساتھ رہے ہیں، لیکن اس کے باوجود ہازا نے ’’اپنے‘‘ علاقے میں آنے والے ان پناہ گزینوں کا نہ تو حقارت کی نگاہ سے دیکھا، نہ ہی دھتکارا اور نہ ہی اسے زمین پر قبضے کی کوشش قرار دے کے آنے والوں کے خلاف اعلان جنگ کیا۔ اس کی بنیادی وجہ یہ ہے کہ ہازا افراد کے نزدیک ذاتی ملکیت کا تصور نہیں پایا جاتا۔ ماہرین کے مطابق زمین پر ذاتی ملکیت کا تصور زراعت کی ابتدا کے بعد ہوا اور ساتھ ہی کاشت کاری سے غذاء کے حصول کے بعد متعدی امراض، سماجی طبقاتی نظام، گاہے بہ گاہے قحط سالی اور بڑی سطح پر جنگ و جدل کا ظہور ہوا۔ یونیورسٹی آف کیلیفورنیا سے تعلق رکھنے والے محقق و مصنف جیرڈ ڈائمنڈ زراعت کو ’’انسانی تاریخ کی سب سے بڑی غلطی‘‘ قرار دیتے ہیں، جسے اب کبھی سدھارا نہیں جاسکے گا۔

ماہرین کا کہنا ہے کہ ہازا افراد کی روزمرہ خوراک آج بھی ترقی یافتہ دنیا میں بسنے والے افراد کے مقابلے میں بہت مختلف ہے اور وہ اب بھی اناج کی ’’دریافت‘‘ سے قبل کے غذائی معمول پر عمل پیرا ہیں۔ ان کا کوئی پیشہ نہیں، کاروبار یا ملازمت کا کوئی تصور نہیں ، آقا و غلام کی کوئی تفریق نہیں۔ یہ اپنے خاندان کے چھوٹے چھوٹے گروہ بنا کر رہتے ہیں جس میں مرد دن میں کم از کم چھے گھنٹے تک شکار کی تلاش میں گزارتے ہیں۔ عورتیں دن بھر پھل اور جنگلی ترکاریاں جمع کرتی ہیں، مرد شکار کے ساتھ ساتھ شہد بھی حاصل تلاش کرتے ہیں۔ ہازا افراد پر تحقیق کرنے والے تمام ہی محققین نے انھیں باقاعدہ ’’قبیلہ‘‘ قرار دینے میں تامل کا مظاہرہ کیا ہے، جیسا کہ پہلے ذکر ہوا کہ یہ مختلف گروہ یا ٹکڑیوں کی صورت میں رہتے ہیں اس لیے ان گروہوں کے لیے ’’کیمپ‘‘ کا لفظ استعمال ہوتا ہے جو عام طور پر بیس سے تیس افراد پر مشتمل ہوتا ہے۔ صرف جنگلی بیری کے موسم میں یہ کیمپ آپس میں مل کر سو افراد تک کا کیمپ بنا لیتے ہیں۔ ان میں قبائلی سرداری نظام کا وجود نہیں، جب ایک ہی کیمپ کے افراد کے درمیان کوئی تنازعہ جنم لیتا ہے تو عمومی طور پر کوئی ایک فریق اپنا کیمپ چھوڑ کا دوسرے کیمپ میں شامل ہوجاتا ہے اور تنازعہ ختم ہوجاتا ہے۔ اسی طرح اگر کوئی فرد بیمار ہو جائے تو بھی وہ اپنا کیمپ چھوڑ دیتا ہے کیوں کہ کئی بار وہ بیماری کا سبب اس جگہ کو سمجھتا ہے جہاں اس کا کیمپ آباد ہے۔ کیمپ شکار کی دست یابی، موسم کی تبدیلی اور جنگلی پھلوں تک آسان رسائی کو مد نظر رکھتے ہوئے ایک جگہ سے دوسری جگہ منتقل ہوتے رہتے ہیں۔ اگر کیمپ کا کوئی مرد اپنے کیمپ کی جائے سکونت سے دورکوئی بڑا جانور شکار کرلیتا ہے تو پورا کیمپ ہی عارضی ’’شکار گاہ‘‘ منتقل ہوجاتا ہے اور گوشت ختم ہونے تک وہیں دعوت اڑاتا ہے۔

ہازا قبائل چوں کہ مستقل گھر نہیں بناتے اور نہ ہی ان کے پاس زیادہ ساز و سامان ہوتا ہے اس لیے سال بھر کے مختلف اوقات میں یہ بیاباں گردی کرتے رہتے ہیں اور ایک جگہ سے دوسری جگہ بہ آسانی منتقل ہوجاتے ہیں۔ بیرونی حملہ آوروں کے ہاتھوں غلامی کے علاوہ ہازا افراد نے آس پڑوس کے ترقی پذیر قبائل کے ہاتھوں بھی کئی مشکلات کا سامنا کیا، ان کی تعداد محدود تر ہوتی گئی۔ ان کی چلتی پھرتی بستیاں رفٹ ویلی کے علاقے میں ایک جگہ سے دوسری جگہ منتقل ہوتی رہتی ہیں۔ ہازا کی طرح دیگر قدیم شکاری گروہ یا قبائل کے طرز حیات میں زراعت اور دیگر جدید طور طریقے شام ہوچکے ہیں، وہ کچی مٹی کے گھر بھی بناتے ہیں اور ان کے ہاں کسی حد تک تعلیم کا رواج بھی جڑ پکڑ چکا ہے لیکن ہازا ہیں کہ بدلنے کو تیار نہیں۔ تنزانیہ کے حکام اپنے ملک میں بسنے والے ہازا اور اس جیسے دیگر قبائل یا گروہوں کو اپنے قومی امیج پر داغ تصور کرتے ہیں۔ ان کی نگاہ عالمی سطح پر ہونے والی معاشی تبدیلیوں اور ترقی میں دنیا کے ساتھ قدم سے قدم ملا کر چلنے کے لیے قدیم طرز زندگی پر کاربند ان انسانوں کو تبدیل کرنے کی ضرورت ہے۔ تنزانیہ کی حکومت کی جانب سے اس سلسلے میں کئی اقدامات بھی کیے گئے جس کے نتیجے میں بہت سے قبائل تو ’’طرز کہن‘‘ چھوڑ کر ’’آئین نو‘‘ اپنانے کو تیار ہوچکے ہیں لیکن ہازا افراد کے معاملے میں یہ کوششیں زیادہ کام یاب ثابت نہیں ہوسکیں۔ اسی وجہ سے چند برس قبل تنزانیہ کے صدر جکایا کک ویتے نے انھیں تنبیہ کی تھی کہ ’’ہازا! تمھیں بدلنا ہوگا‘‘۔ حکومت کی جانب سے انھیں سرکاری ملازمتوں اور ان کے بچوں کو تعلیم فراہم کرنے کے مختلف پروگرامز بھی شروع کیے گئے لیکن بڑی سطح پر اس کے مثبت نتائج برآمد نہیں ہوئے۔