کینیڈا: مسلمان مسافر کی انوکھی قربانی

کینیڈا میں دورانِ سفر ایک مسلمان مسافر نے ننگے پاؤں شخص کو اپنے جوتے پیش کردیے اور خود ننگے پاؤں گھر کی جانب روانہ ہوگیا- کینیڈا کے شہر ٹورنٹو میں مسلمانوں کی وضع قطع رکھنے والے ایک باریش شخص نے بس میں سفر کے دوران ایک ایسے شخص کو دیکھا جس نے جوتوں کی جگہ پاؤں کو بالوں سے بنی ایک جالی میں لپیٹ رکھا تھا اور اس کا لباس بھی زیادہ اچھی نہیں تھا- جس کا مطلب ہے کہ اس مفلوک الحال شخص کے پاس پہننے کے لیے جوتے نہیں تھے-
 

اپنی منزل پر پہنچ کر بس سے اترنے سے پہلے باریش مسلمان نے اپنے جوتے اتار کر اس ننگے پاؤں مسافر کو پیش کردیے اور کہا کہ میں نے قریب ہی جانا ہے٬ میں پیدل چلتے ہوئے یہ مختصر سفر باآسانی جوتوں کے بغیر طے کرسکوں گا-

اس سارے واقعے کے دوران بس کے ایک آف ڈیوٹی ڈرائیور نے یہ عمل اپنے کیمرے میں محفوظ کرلیا٬ تصویر بنانے والے آف ڈیوٹی ڈرائیور سرجیت سنگھ ورک کا کہنا ہے باریش مسلمان اپنے جوتوں کے ساتھ اپنی جرابیں بھی دوسرے شخص کو بن مانگے پیش کیں اور جلدی سے بس سے اتر گیا-

ڈرائیور نے بتایا کہ مسلمان مسافر نے اس دوران بس اتنا کہا کہ آپ یہ جوتے پہن سکتے ہیں٬ پریشان نہ ہوئیے گا میں قریب ہی رہتا ہوں٬ میں ننگے پاؤں جاسکوں گا-