مذہبی جلسوں میں شوروغل کا ماحول!

کیاسیرت النبی ﷺ کے جلسے میں تقریریں اﷲ کوراضی کرنے کیلئے ہورہی ہیں،یامخلوق کودکھانے کیلئے جوش وجذبہ کااظہارہورہاہے،اورگلے پھاڑپھاڑکرکرسیوں ،میزاورمائک پرزورزورسے ہاتھ مارے جاتے ہیں۔

اگراﷲ کوراضی کرنے کیلئے ہے،توپھرچندسامعین کیلئے لاؤڈاسپیکرکوباہرلگانے کی کیاضروت ؟کیاآپ کو نہیں معلوم ؟ایک شخص مسجدنبوی میں زورزورسے تقریرکرتاتھا،حضرت عائشہ صدیقہ رضی اﷲ عنہاکے حجرے تک آوازپہونچتی تھی،آپ کے آرام میں خلل ہوتاتھا،آپ نے امیرالمؤمنین حضرت عمرفاروق رضی اﷲ عنہ سے شکایت کی،حضرت عمرفاروق رضی اﷲ عنہنے اس شخص کومنع کیا،ا و ر کہا : اپنی آواز موجود سامعین تک ہی پہونچانا،باہرآوازنہ جائے،مگروہ نہ مانا،اوردوسرے دن پھرزورزورسے تقریریں شروع کردیں،حضرت عائشہ صدیقہ رضی اﷲ عنہانے پھرشکایت کی،حضرت عمرفاروق رضی اﷲ عنہ نے اس بارسختی سے منع کیا ، اور کہا: اگر اب بھی نہ مانے تومیں اس لکڑی کو تمہارے بدن پر توڑ دونگا۔

چندسامعین کوسنانے کیلئے پورے محلہ میں لاؤڈاسپیکرکے ذریعہ آوازپہونچائے جاتے ہیں،کیاہم نے کبھی یہ بھی سوچاکہ محلہ میں کچھ بوڑھے،بچے،اوربیمارمردوعورت بھی ہونگے،وہ اپنی درد،بے چینی اور بیما ر ی سے کراہ رہے ہونگے،وہ سکون چاہتاہوگا،وہ آرام کی نیندسوناچاہتاہوگا،مگرآپ کی زوردارآوازاسے مسلسل پریشان کرہی ہوگی،اگرحضرت عمرفاروق آج کے ماحول کودیکھ لیتے توبتائیے کیاکرتے؟

نبی کریم ﷺ نے ارشادفرمایا:کہ اگرمیں نمازمیں کسی بچے کے رونے کی آوازسنتاہوں تو میں نماز کو مختصر کردیتاہوں،کہیں اس کی ماں اس بچے کی آوازسن کرکسی مشقت میں مبتلانہ ہوجائے۔

حضرت جابر رضی اﷲ عنہ روایت کرتے ہیں :کہ نبی کریم ﷺ جب صحابہ کرام سے خطاب کرتے تو بکثرت آپ کی مبارک آنکھیں سرخ ہوجاتیں،اور آواز بلند ہوجاتی،بسااوقات ایسالگتاکہ آپ لوگوں کو کسی آنے والے لشکر سے ڈرارہے ہیں،فرماتے :تمہارے اوپر دشمن کا لشکر حملہ آور ہونے والاہے ،قیامت کے دن اور حساب و کتاب سے ڈراتے،کہتے :میں تمہیں باخبر کرتاہوں کہ ایک بہت بڑاعذاب تمہاراانتظار کررہا ہے ،اس سے بچنے کا کوئی سامان کرو!

آپ ﷺ کی آنکھیں سرخ ہوجاتیں اور کبھی آوازبلند ہوجاتی ،وہ اسلئے کہ جو بات بھی آپ کہتے وہ دل کی آواز ہوتی ،وہ وحی الہی ہوتی ،وہ اﷲ کا فرمان ہوتا،دل سے بات نکلتی تھی جذبہ پرخلوص تھا،اور قوم وملت کے درد سے سرشار تھااور آج کی حالت یہ ہے کہ :
رہ گئی رسم اذان روح بلالی نہ رہی
فلسفہ رہ گیا تلقین غزالی نہ رہی

آج کی تقریروں میں نہ وہ درد ہے ،نہ وہ جذبہ پرخلوص ،نہ تحقیقی باتیں ہیں،نہ نبی کی سیرت پر کوئی اچھی اور سچی گفتگو،بس وہی ایک عنوان اختلافی،وہی گھسی پٹی باتیں ہیں،ہلاہے اور شوروغل،رات رات بھر شعر وشاعری،ڈرامائی انداز میں نعت خوانی ،دوسروں پر طعن وتشنیع اور اپنے بھائیوں کو نیچادکھانے کی کوشش!

جی ہاں یہی ہوتا ہے محلہ کہ ان محفلوں اور جلسوں میں ،صرف اپنی باتیں ہوتی ہیں،اور تقریریوں کے ذریعہ اپنی خواہشات کی آگ بجھائی جاتی ہے ،شاید اسی لئے اس طرح کے پروگراموں میں ہر آئے دن اضافہ ہورہاہے لیکن معاشرہ کی اصلاح نہیں ہوپاتی ہے ،بلکہ معاشرہ اور زیادہ پراگندہ ہورہاہے ،وجہ یہ ہے دین کے نام پر منعقد ان محفلوں میں دین کی بے حرمتی ہورہی ہے ،اپنے پڑوس میں موجود مسلموں اور غیر مسلموں کی ایذارسانی ہورہی ہے ،اور یہ بتانے کی کوشش ہورہی ہے کہ یہی اسلام ہے ۔

نبی کریم ﷺکی محبت ایمان کی علامت ہے بغیرنبی کی محبت کے ایمان مکمل نہیں ہوسکتاہے؛لیکن ہماری محبت کیاصحابہ کرام رضوان اﷲ علیہم اجمعین سے بھی زیادہ ہے ؟ایساسوچنابھی کسی گناہ سے کم نہیں ہے، کیا صحابہ کرام نے کبھی محرم اور ماہ ربیع الاول کے مہینہ میں محلہ محلہ،قریہ قریہ ،شہرشہر اس طرح شور وشغف کیاکرتے تھے۔

جب کہ حضرات صحابہ کرام کے ذریعہ سے اسلام بڑی تیزی سے پوری دنیامیں پھیلاہے ، اور ہندوستان میں بھی اگر اسلام کی گونج سنائی دیتی ہے، تو انہیں کی بدولت،وجہ یہ تھی کہ وہ لوگ نبی کریم ﷺکی تعلیمات کے عملی نمونہ تھے ،نبیﷺ سے کوئی بات سنی اور اسے اپنی زندگی میں پیش نہیں کیا ایساناممکن تھا،۔

صحابہ کرام نے تجارت کی ،بزنس کی،کاروبار کئے،غیر مسلموں سے دیگر معاملات کئے ؛مگر نبی کریم ﷺ سے جو اخلاق کریمہ انہوں نے سیکھی تھی اس پر ہمیشہ کاربند رہے،جھوٹ نہیں بولتے،امانت میں خیانت نہیں کرتے ،اور خوش اخلاقی کا مظاہرہ کرتے ،غیر مسلمین ان کے اخلاق سے بیحد متاثر ہوئے ،اس لئے صحابہ کرام کے پاؤں جہاں جہاں پڑے ہیں وہاں بہاریں آگئیں اور جو ق در جوق لوگ اسلام میں داخل ہونے لگے۔

آج ہمارے معاملات صحیح نہیں ،ہمارے اخلاق اچھے نہیں،صرف جلوس ،صرف ہلا، شوروٖغل، پڑوسیوں کی ایذارسانی ،صرف انا،اور اپنی چودھراہٹ کو برقرار رکھنے کا خیال!
نہ محبت ،نہ مروت ،نہ شرافت ،نہ خلوص
ہم بھی شرمندہ ہیں اس زمانہ میں مسلماں ہوکر