آج کل پھٹی ہوئی شرٹس اور جینز پہننے کا دور ہے جو کہ آج کے تازہ ترین فیشن کا حصہ ہے۔ بڑی معروف برانڈز کمپنیوں نے ایسے مہنگے لیکن جگہ جگہ سے پھٹے ڈیزائینز طرز کے کپڑے متعارف کرائے ہیں جن کی قیمت ہزاروں ڈالرز میں ہوتی ہے۔ وہیں اب پھٹے سویٹرز بھی مارکیٹ میں آگئے ہیں جن کی قیمت جان کر آپ کے ہوش اڑ جائیں گے۔
عام طور پر لوگ ٹھنڈے موسم میں گرم سویٹرز پہنتے ہیں جو اچھی طرح بھنا ہوا ہوتا ہے۔ لیکن کیا کوئی موسم سرما میں پھٹا ہواسویٹر پہننا پسند کریگا؟
لیکن اٹلی کی جانب سے مہنگے کپڑے بنانے والی ایک بڑی کمپنی نے پھٹے ہوئے سویٹر پیش کردئیے ہیں جو کہ پہننے میں کافی آرام دہ ہیں جن کی قیمت 1450 ڈالر یعنی تقریباً دو سے ڈھائی لاکھ پاکستانی روپے بتائی گئی ہے۔
بیلنسیاگا نامی کپڑوں کی کمپنی کی جانب سے تیار کردہ سویٹروں کو دیکھ کر لگتا ہے جیسے وہ بہت پرانے ہوں، انہیں چوہوں نے جگہ جگہ سے کتر دیا ہو اور وہ جگہ جگہ سے ادھڑے ہوئے ہیں۔
کمپنی کا دعویٰ ہے کہ سویٹر پہننے میں بہت پرسکون ہے اور گرم رکھنے والا ہے کیونکہ یہ بھیڑوں سے پہلی بار اتاری گئی تازہ اُون سے تیار کیا گیا ہے۔