لاہور: چیئرمین پاکستان تحریک انصاف عمران خان نے کہا ہے کہ لاہور والو! سب سے زیادہ آپ کی ٹریننگ کر رہا ہوں، جب ضرورت پڑے تو آپ نے نکلنا ہے۔
سابق وزیراعظم عمران خان نے کارکنان سے خطاب کرتے ہوئے کہا میں نے اپنی زندگی کے تجربے سے جو سیکھا وہ آپ کو سکھلانا چاہتا ہوں، جب میں کھلاڑی تھا تو ہر روز پہلے سے زیادہ محنت کرتا تھا۔
شہباز شریف پرسخت تنقید کرتے ہوئے انہوں نے کہا ہمارا وزیراعظم دنیا بھر میں مانگ کر ہمیں ذلیل کر رہا ہے، جس معاشرے میں عدل و انصاف ہو گا وہ ترقی کرے گا، ماضی میں چھوٹے چوروں کو سزا ملتی تھی لیکن بڑوں کو چھوڑ دیتے تھے تو قومیں تباہ ہوئیں۔
عمران خان نے استفسار کیا کہ لوگ یورپ کیوں جاتے ہیں؟ کیونکہ وہاں نظام بہتر ہے ، پاکستان میں وسائل زیادہ ہیں لیکن نظام نہیں ہے۔
چیئرمین پی ٹی آئی عمران خان نے کہا ہم ملک میں انصاف کی جنگ لڑ رہے ہیں تاکہ خوشحالی آئے۔