ایک بھارتی وکیل کی جانب سے پاکستان کے اسٹار کرکٹر محمد رضوان کے خلاف گراؤنڈ میں نماز ادا کرنے اور غزہ کی حمایت میں آواز اٹھانے پر شکایت درج کرائی گئی ہے۔
ونیت جندال نامی وکیل نے انٹرنیشنل کرکٹ کونسل (آئی سی سی) کے چیئرمین گریگ بارکلے کو بھیجی گئی اپنی شکایت میں محمد رضوان کی نماز کی ادائیگی پر اعتراض کرتے ہوئے وکٹ کیپر بلے باز کے خلاف سخت کارروائی کی اپیل کی ہے۔
محمد رضوان نے حیدرآباد میں نیدر لینڈ کے خلاف پاکستان کے افتتاحی میچ کے دوران نماز ادا کی تھی اور پھر 10 اکتوبر کو سری لنکا کے خلاف اپنی سنچری "غزہ کے بھائیوں اور بہنوں" کے نام وقف کی تھی۔
ونیت جندال نے آئی سی سی کے چیئرمین کو مخاطب کرتے ہوئے اپنی شکایت میں کہا۔محمد رضوان کا عمل جب وہ کرکٹ کے میدان میں بہت سے ہندوستانیوں کے درمیان نماز پڑھتا ہے تو وہ اس کے مذہب کی جان بوجھ کر تصویر کشی کی علامت ہے جو کھیلوں کی روح کے خلاف ہے۔
انہوں نے مزید کہاکہ میدان میں محمد رضوان کی طرف سے اپنے مذہب کی نمائندگی کرنے کا عمل اور اس کے بعد غزہ کے لوگوں کے لیے اپنی فتح کے جذبے سے متعلق پریس کانفرنس میں ان کا بیان ان کے مذہبی اور سیاسی نظریے کی مزید تصدیق کرتا ہے۔