گلشن حدید فیز 2 میں دو مبینہ ملزمان اس وقت عوام کے ہتھے چڑھ گئے جب وہ ایک دکان میں لوٹ مار کی کوشش کر رہے تھے۔ مشتعل شہریوں نے دونوں ملزمان کو پکڑ کر تشدد کا نشانہ بنایا اور بعد ازاں پولیس کے حوالے کر دیا۔
پولیس کے مطابق دونوں ملزمان صبح کے وقت دفاتر جانے والے شہریوں اور دکانوں کو نشانہ بنایا کرتے تھے۔ واردات کے دوران ملزمان بریانی سینٹر میں داخل ہوئے اور مزاحمت پر ایک شہری کو زخمی کر دیا۔ دکان میں موجود ایک شخص نے اپنی لائسنس یافتہ پستول سے فائرنگ کی۔
فائرنگ کی آواز سن کر عوام کی بڑی تعداد موقع پر جمع ہو گئی اور دونوں ملزمان کو دبوچ لیا۔ شہریوں نے موقع پر ہی ملزمان کی خوب دھلائی کی، بعدازاں پولیس نے موقع پر پہنچ کر دونوں ملزمان کو حراست میں لے لیا۔
پولیس کے مطابق گرفتار ملزمان کے قبضے سے ایک پستول اور موٹر سائیکل برآمد ہوئی ہے جو ممکنہ طور پر وارداتوں میں استعمال کی جا رہی تھی۔ واقعے میں زخمی ہونے والے شہری کو فوری طور پر طبی امداد کے لیے اسپتال منتقل کر دیا گیا ہے۔