بلوچستان ہائی کورٹ بار ایسوسی ایشن کی جانب سے شاہوانی اسٹیڈیم کوئٹہ میں بی این پی کے جلسے پر ہونے والے بم دھماکے کے خلاف آج بلوچستان بھر کی عدالتوں میں بائیکاٹ جاری ہے۔
بلوچستان ہائی کورٹ بار ایسوسی ایشن کےصدراور کابینہ نے مشترکہ بیان میں بی این پی کے جلسے پر دھماکے کی شدید مذمت کرتے ہوئے کہا کہ یہ بزدلانہ دہشت گردی کا واقعہ نہ صرف بے گناہ انسانی جانوں کے ضیاع کا باعث بنا بلکہ امن دشمن عناصر کی گھناؤنی سازش اور ملک کو عدم استحکام سے دوچار کرنے کی کوشش ہے۔
بلوچستان ہائی کورٹ بار ایسوسی ایشن شہداء کے بلندیٔ درجات اور جنت الفردوس میں اعلیٰ مقام کے لیے دعاگو ہے جبکہ زخمیوں کی جلد صحتیابی کی بھی دعا کرتے ہیں۔
مزید برآں، بلوچستان ہائی کورٹ بار ایسوسی ایشن حکومت اور متعلقہ اداروں سے مطالبہ کرتی ہے کہ واقعے میں ملوث دہشت گردوں اور ان کے سہولت کاروں کو فی الفور قانون کے کٹہرے میں لایا جائے، شہریوں کے جان و مال کے تحفظ کے لیے مؤثر اور ٹھوس اقدامات اٹھائے جائیں اور صوبے میں امن و امان کی صورتحال کو بہتر بنانے کے لیے سنجیدہ حکمت عملی اختیار کی جائے۔