مستونگ شہر کے مرکزی بازار میں واقع نجی بینک میں دن دہاڑے ڈکیتی کی واردات ہوئی جہاں 6 سے 8 مسلح افراد بینک میں داخل ہو کر 15 لاکھ 60 ہزار روپے نقدی لوٹ کر فرار ہوگئے۔
پولیس ذرائع کے مطابق ڈاکوؤں نے بینک کے عملے کو یرغمال بنایا اور نقدی لوٹنے کے بعد موقع سے فرار ہو گئے۔ واردات کے دوران بازار میں شدید بھگدڑ مچ گئی دکانداروں نے دکانیں بند کر لیں ۔
واقعے کی اطلاع ملتے ہی سکیورٹی فورسز اور پولیس کی بھاری نفری موقع پر پہنچ گئی اور علاقے کو گھیرے میں لے کر تحقیقات کا آغاز کر دیا گیا۔
پولیس حکام کا کہنا ہے کہ ڈکیتی میں ملوث ملزمان کی تلاش کے لیے قریبی علاقوں میں سرچ آپریشن شروع کر دیا گیا ہے جبکہ سی سی ٹی وی فوٹیج حاصل کر کے ملزمان کی شناخت کی جا رہی ہے۔