راولپنڈی میں افسوسناک واقعہ پیش آیا جہاں چار سالہ بچہ گڑھے میں گر کر جاں بحق ہو گیا۔ جاں بحق ہونے والے بچے کی شناخت عبدالہادی کے نام سے ہوئی ہے۔
عینی شاہدین کے مطابق بچہ اپنے گھر کے قریب کھیل رہا تھا کہ اچانک زیرِ تعمیر جگہ میں موجود کھلے گڑھے میں جا گرا۔ واقعے کی اطلاع ملتے ہی مقامی افراد اور ریسکیو ٹیمیں موقع پر پہنچ گئیں اور بچے کو گڑھے سے نکال کر اسپتال منتقل کیا گیا تاہم ڈاکٹروں نے اسپتال پہنچنے پر بچے کی موت کی تصدیق کر دی۔
علاقہ مکینوں نے انتظامیہ اور ذمہ داران پر شدید غم و غصے کا اظہار کرتے ہوئے کہا کہ تعمیراتی کام کے دوران حفاظتی اقدامات نہ ہونے کے باعث یہ افسوسناک سانحہ پیش آیا۔
شہریوں نے مطالبہ کیا ہے کہ زیرِ تعمیر اور خطرناک مقامات کو فوری طور پر محفوظ بنایا جائے تاکہ مستقبل میں ایسے حادثات سے بچا جا سکے۔پولیس نے واقعے کی تحقیقات شروع کر دی ہیں اور سوسائٹی انتظامیہ سے غفلت کے پہلوؤں پر پوچھ گچھ کی جا رہی ہے۔