سونا آج بھی عالمی اور مقامی دونوں مارکیٹوں میں اپنی بلند ترین سطح پر مستحکم رہا، قیمتوں میں کسی قسم کی کمی یا اضافہ نہیں ہوا۔
آل پاکستان صرافہ جیمز اینڈ جیولرز ایسوسی ایشن کے تازہ اعداد و شمار کے مطابق، ملک بھر میں فی تولہ سونا 4 لاکھ 25 ہزار 178 روپے پر برقرار ہے، جبکہ 10 گرام سونے کی قیمت 3 لاکھ 64 ہزار 521 روپے ریکارڈ کی گئی۔
ایسوسی ایشن کے مطابق، عالمی منڈی میں بھی سونے کی قیمت 4 ہزار 39 امریکی ڈالر فی اونس پر جمی ہوئی ہے۔
معاشی ماہرین کے مطابق، سونا اس وقت تاریخی طور پر مہنگے ترین دور میں داخل ہو چکا ہے، اور 2025 میں اس کی قیمت میں 50 فیصد سے زائد اضافہ دیکھنے میں آیا ہے جس کی وجہ صرف عالمی سیاست نہیں بلکہ معاشی غیر یقینی صورتحال بھی ہے۔