پاکستان کے ٹیلی کمیونیکیشن سیکٹر میں ایک بڑی پیش رفت سامنے آئی ہے یو فون نے ٹیلی نار پاکستان کو باضابطہ طور پر خرید لیا ہے۔
ذرائع کے مطابق دونوں کمپنیوں کے درمیان تمام قانونی، مالی اور انتظامی مراحل مکمل کر لیے گئے ہیں جس کے بعد ٹیلی نار پاکستان اب ایک الگ ادارے کے طور پر وجود نہیں رکھے گا اور مکمل طور پر یو فون کے ڈھانچے میں ضم کر دیا گیا ہے۔
یہ معاہدہ پاکستان کی ٹیلی کام انڈسٹری میں ایک اہم سنگِ میل قرار دیا جا رہا ہے جس سے مارکیٹ میں آپریٹرز کی تعداد میں کمی اور مقابلے کے نئے اصول متعارف ہونے کا امکان ہے۔
یو فون کے ترجمان نے تصدیق کی ہے کہ اس انضمام کے بعد صارفین کو بہتر نیٹ ورک کوالٹی، جدید ڈیجیٹل سروسز اور وسیع کوریج فراہم کی جائے گی۔ ترجمان کے مطابق صارفین کو کسی قسم کی سروس میں تعطل کا سامنا نہیں ہوگا اور تمام سسٹمز کو بتدریج یکجا اور اپ گریڈ کیا جائے گا۔
ٹیلی کام ماہرین کا کہنا ہے کہ یہ اقدام پاکستان کے ٹیلی کام سیکٹر میں استحکام اور سرمایہ کاری کے نئے مواقع پیدا کرے گا، تاہم اس کے اثرات مسابقت اور قیمتوں پر آنے والے چند مہینوں میں واضح ہوں گے۔
واضح رہے کہ ٹیلی نار پاکستان نے 2004 میں اپنی سروسز کا آغاز کیا تھا اور گزشتہ دو دہائیوں کے دوران ملک کے ٹیلی کام مارکیٹ میں نمایاں کردار ادا کیا۔ یو فون کے ساتھ انضمام کے بعد کمپنی کو ممکنہ طور پر "یو فون ٹیلی نار" کے نئے برانڈ یا متحدہ شناخت کے تحت متعارف کرانے پر غور کیا جا رہا ہے۔