اسلام آباد: پاکستان فٹبال ٹیم کے ہیڈ کوچ نولبرٹو سولانو نے کہا ہے کہ قومی ٹیم ایشین کپ 2027ء کے کوالیفائر میں افغانستان کے خلاف اپنے اہم آوے میچ کے لیے پوری طرح تیار اور پُراعتماد ہے۔ یہ میچ کل (14 اکتوبر) کو کویت کے علی صباح السالم اسٹیڈیم، اردیہ میں رات 8 بجے (پاکستان وقت) کھیلا جائے گا۔
پری میچ پریس کانفرنس سے خطاب کرتے ہوئے نولبرٹو سولانو نے کہا کہ ٹیم اپنے پچھلے میچ سے حوصلہ افزا کارکردگی کے ساتھ میدان میں اترے گی۔
انہوں نے کہا، ہم اس بات سے کچھ مایوس تھے کہ گھریلو میچ میں تین پوائنٹس حاصل نہیں کر سکے، خاص طور پر دوسرے ہاف میں عمدہ کھیل کے باوجود۔ لیکن یہ سارا عمل سیکھنے کا حصہ ہے — یہ نوجوان کھلاڑی پہلی بار ایک ساتھ کھیل رہے ہیں، اور میں ان کی کارکردگی سے بہت خوش ہوں۔
ہیڈ کوچ نے مزید کہا کہ کل کے میچ میں ٹیم اسی جذبے اور جیت کے عزم کے ساتھ میدان میں اترے گی۔
ہم کل کے میچ میں مکمل فوکس کے ساتھ جائیں گے، ہمارا مقصد تین پوائنٹس حاصل کرنا ہے۔ فٹبال میں کچھ بھی ہو سکتا ہے، مگر ہم پرامید ہیں۔ نومبر میں شام کے خلاف اور مارچ میں مزید میچ ہوں گے، لیکن کل کا میچ ہمارے لیے بہت اہم ہے۔
سولانو نے تصدیق کی کہ ٹیم میں کسی بڑی تبدیلی کا امکان نہیں، تمام کھلاڑی مکمل طور پر فٹ اور تیار ہیں۔
قومی ٹیم کے کپتان عبداللہ اقبال نے بھی اپنے کوچ کے خیالات کی تائید کی اور کہا کہ ٹیم کو اپنی صلاحیتوں پر مکمل یقین ہے۔
انہوں نے کہا، ہم نے پچھلے میچ میں دکھایا کہ یہ اسکواڈ کیا کر سکتا ہے۔ ہمیں افسوس تھا کہ ہم جیت حاصل نہیں کر سکے، لیکن امید ہے کہ کل ہم تین پوائنٹس حاصل کریں گے۔
فینز کے نام پیغام میں کپتان نے کہا، “میں وعدہ کرتا ہوں کہ ہم اپنی پوری توانائی کے ساتھ میدان میں اتریں گے، اور انشاءاللہ، تین پوائنٹس کے ساتھ واپس آئیں گے۔
پاکستان اور افغانستان کے درمیان یہ میچ AFC ایشین کپ سعودی عرب 2027 کے کوالیفائر مرحلے کا ایک اہم مقابلہ ہوگا، جس میں کامیابی قومی ٹیم کی پوزیشن کے لیے نہایت اہمیت رکھتی ہے۔