بالی ووڈ کے معروف ہدایتکار اور مصنف ابھینو کشیپ نے ایک انٹرویو میں دعویٰ کیا ہے کہ سپر اسٹار سلمان خان اپنے بھائی ارباز خان کے ساتھ خوشگوار تعلقات نہیں رکھتے تھے اور فلم دبنگ کے دوران ان سے ناخوش تھے۔
بھارتی میڈیا کے مطابق ابھینو کشیپ نے انکشاف کیا کہ سلمان خان نے فلم دبنگ میں ارباز خان کے کئی مناظر حذف کروا دیے کیونکہ وہ نہیں چاہتے تھے کہ اسکرین پر ارباز کا کردار نمایاں ہو۔ ان کا کہنا تھا کہ سلمان خان فلم کے فوکس میں صرف خود کو رکھنا چاہتے تھے۔
ہدایتکار نے مزید دعویٰ کیا کہ فلم کے سیٹ پر دونوں بھائیوں کے درمیان تلخ کلامی بھی ہوئی تھی جبکہ سلمان خان نے مبینہ طور پر فلم کے ایڈیٹر کو اغوا کر کے دبنگ کے فائنل کٹ پر مکمل کنٹرول حاصل کرنے کی کوشش کی تھی۔
یاد رہے کہ 2010 میں ریلیز ہونے والی سپرہٹ فلم دبنگ کو ابھینو کشیپ نے ہی ڈائریکٹ کیا تھا۔ وہ ماضی میں بھی سلمان خان اور ان کے خاندان پر سنگین الزامات عائد کر چکے ہیں تاہم خان خاندان کی جانب سے ان بیانات پر کوئی باضابطہ ردِعمل سامنے نہیں آیا۔