معروف میزبان نادیہ خان کے پروگرام میں نوجوان فیشن ڈیزائنر پریشے عدنان سے جم کے لباس اور ورزش کی ویڈیوز سے متعلق سوالات نے سوشل میڈیا پر نئی بحث چھیڑ دی۔ پریشے حال ہی میں نیویارک فیشن ویک میں اپنی کلیکشن پیش کرنے کے بعد پروگرام میں شریک ہوئی تھیں جہاں گفتگو کے دوران ان کے جم میں پہنے جانے والے لباس اور والدین کے ممکنہ ردعمل کے بارے میں سوال کیا گیا۔
پریشے نے جواب دیتے ہوئے کہا کہ ورزش کے دوران حفاظت اپنی جگہ ایک اہم معاملہ ہے تاہم انہیں ایسے پیغامات بھی موصول ہوتے ہیں جن میں لوگ بتاتے ہیں کہ ان کی ویڈیوز دیکھ کر انہوں نے ورزش اور اسٹرینتھ ٹریننگ شروع کی۔ بعد میں سوشل میڈیا پر اپنے مؤقف کا اظہار کرتے ہوئے انہوں نے کہا کہ وہ سوال کے پس منظر کو سمجھ گئی تھیں لیکن انہوں نے گفتگو کے دوران خود کو پُرسکون رکھنے کی کوشش کی۔
معاملہ سامنے آنے کے بعد کئی شوبز شخصیات نے پریشے کے حق میں آواز اٹھائی۔ ہانیہ عامر نے اپنی تصاویر کے ساتھ ایسا جملہ شیئر کیا جو بظاہر اسی گفتگو کی طرف اشارہ تھا جبکہ یاسر حسین نے بھی میزبان کا نام لیے بغیر پروگرام میں ہونے والی گفتگو پر طنزیہ تبصرہ کیا۔
گلوکارہ یشل شاہد نے بھی منفرد انداز میں اپنا ردعمل دیا۔ انہوں نے کمبل اوڑھ کر ورزش کرنے کی ویڈیو بنائی اور طنزیہ انداز میں یہ سوال اٹھایا کہ کیا اب خواتین کو جم میں تنقید سے بچنے کے لیے اسی طرح ورزش کرنا ہوگی۔
اس گفتگو کے بعد بحث صرف ایک لباس یا جم کی ویڈیوز تک محدود نہیں رہی بلکہ یہ سوال بھی زیرِ بحث آگیا کہ کسی خاتون سے اس کی ذاتی پسند اور لباس کے بارے میں سوال کرتے ہوئے گفتگو کی حدود کہاں ہونی چاہئیں۔