مہمان ٹیم نے پاکستان کو جیت کے لیے 264 رنز کا ہدف دیا تھا جو کہ میزبان نے آخری اوور کی چوتھی گیند پر آٹھ وکٹوں کے نقصان پر حاصل کر لیا۔
ون ڈے کپتان بننے پر یہ شاہین کی پہلی فتح ہےفیصل آباد میں 17 سال بعد انٹرنیشنل کرکٹ کی واپسی پر پاکستان نے جنوبی افریقہ کو پہلے ون ڈے انٹرنیشنل میں دو وکٹوں سے شکست دی ہے۔
مہمان ٹیم نے پاکستان کو جیت کے لیے 264 رنز کا ہدف دیا تھا جو کہ میزبان نے آخری اوور کی چوتھی گیند پر آٹھ وکٹوں کے نقصان پر حاصل کر لیا۔
ہدف کے تعاقب میں سلمان آغا نے 62 کلیدی رنز بنائے جس میں پانچ چوکے اور ایک چھکا شامل تھا۔ انھیں میچ کا بہترین کھلاڑی قرار دیا گیا۔ جبکہ انھیں محمد رضوان کی بھی نصف سنچری کا ساتھ میسر رہا۔
ہدف کے تعاقب میں سلمان آغا نے 62 کلیدی رنز بنائے جس میں پانچ چوکے اور ایک چھکا شامل تھابابر اعظم محض سات رنز پر آؤٹ ہوئے تھے مگر ان سے قبل اوپنرز فخر زمان اور صائم ایوب نے اچھا آغاز فراہم کیا تھا۔
بالآخر میچ کے آخری اوور کی چوتھی گیند پر نسیم شاہ نے لیگ بائی سکور کیا جس سے پاکستان کی جیت ممکن ہوئی تھی۔
یہ ون ڈے کرکٹ میں فیصل آباد میں سب سے بڑا رنچیز ہے۔ کرکٹ ویب سائٹ کرک انفو کے مطابق 2008 میں پاکستان نے ہی زمبابوے کے خلاف 245 رنز کے ہدف کا کامیابی سے تعاقب کیا تھا۔
پاکستان نے ون ڈے سیریز میں ایک صفر کی برتری حاصل کر لی ہے۔ اس سے قبل پاکستان نے جنوبی افریقہ کے خلاف ٹی ٹوئنٹی سیریز جیت لی تھی جبکہ ٹیسٹ سیریز ایک، ایک فتح کے ساتھ برابر ہوئی تھی۔
پہلی اننگز کا احوال
ٹاس جیت کر میزبان ٹیم نے پہلے بولنگ کا فیصلہ کیا تھا۔ میچ کی پہلی اننگز میں پاکستانی ٹیم کے بولرز تمام 10 وکٹیں حاصل کرنے میں کامیاب رہے اور مہمان ٹیم 49.1 اوورز میں 263 رنز بنا کر آل آؤٹ ہوگئی۔
جنوبی افریقہ کے اوپنرز نے 98 رنز کی شراکت کے ساتھ ٹیم کو بہترین آغاز فراہم کیا تھا۔ جنوبی افریقہ کے دونوں اوپنرز لوان ڈری پریٹوریس اور کوئنٹن ڈی کاک نے نصف سنچریاں بنائیں۔
مگر اپنا پہلا میچ کھیلنے والے پریٹوریس 16ویں اوور میں صائم ایوب کا شکار بنے اور یہیں سے پاکستان کو وقفے وقفے سے وکٹیں ملنا شروع ہو گئیں۔
نسیم شاہ نے 63 رنز کھیلنے والے کوئنٹن ڈی کاک کو بولڈ کیا۔ پھر صائم نے اپنی ہی بولنگ پر زورزی کا کیچ پکڑا۔ محمد نواز کی پہلی وکٹ 26 سالہ سینتھمبا قشیلے کی تھی جنھوں نے 22 رنز بنائے۔
ڈوناون فریرا محض تین رنز بنا کر ابرار کی گیند پر آؤٹ ہوئے۔ جارج لنڈے نے بھی صرف دو رنز بنائے اور وہ نسیم کا دوسرا شکار بنے۔
کپتان میتھیو بریٹزکے 42 رنز پر اور فارچیون صفر پر ابرار احمد کا شکار بنے۔
لوئر مڈل آرڈر میں کھیلتے ہوئے آل راؤنڈر کوربن بوش نے 41 رنز بنائے اور ان کی وکٹ کپتان شاہین شاہ آفریدی نے حاصل کی۔ پھر نسیم نے تیسری وکٹ لیزاد ولیمز کی حاصل کی۔
اس میچ میں نسیم شاہ اور ابرار احمد کو تین، تین وکٹیں ملیں جبکہ ابتدا میں صائم ایوب دو اہم وکٹیں حاصل کرنے میں کامیاب رہے۔
نسیم شاہ نے تین وکٹیں حاصل کیںحارث رؤف پر دو میچوں کی پابندی اور پاکستان کا مشکل سے ہدف کا تعاقب
پاکستان میں سوشل میڈیا صارفین نے پاکستان کے فیصل آباد میں سب سے بڑے ہدف کے تعاقب کو سراہا مگر اس دوران درپیش مشکلات کا ذکر کیے بنا نہ رہ سکے۔
ایک صارف نے کہا کہ پاکستان کی 241 رنز پر چار وکٹیں گری ہوئی تھیں مگر صرف 20 رنز کے اضافے کے ساتھ چار وکٹیں گِر گئیں اور یہ رنچیز مشکل ہو گیا۔
حارث رؤف اس میچ کا حصہ اس لیے نہیں بن سکے کیونکہ آئی سی سی کے مطابق انھوں نے ایشیا کپ کے دوران انڈیا کے خلاف میچز میں ضابطہ اخلاق کی خلاف ورزی کی۔ ان پر جنوبی افریقہ کے خلاف پہلا اور دوسرا ون ڈے میچ کھیلنے پر پابندی عائد کی گئی ہے جبکہ آئی سی سی نے انڈین کپتان سوریہ کمار یادیو، صاحبزادہ فرحان اور جسپریت بمرا پر صرف جرمانے عائد کیے ہیں۔
ایک صارف کا کہنا تھا کہ پاکستان کی جانب سے ہدف کا تعاقب ’کمزور دل والے افراد کے لیے نہیں۔‘
ایکس پر ایک صارف نے طنز کیا کہ ’کوئی بھی ٹیم ہدف کے ایسے آسان تعاقب کو اس قدر مشکل نہیں بناتی۔‘
دریں اثنا صارفین نے صائم ایوب اور نسیم شاہ کی بولنگ کی تعریف کی ہے۔
خود صائم نے اننگز کے بعد کہا کہ ’میں بولنگ انجوائے کرتا ہوں۔ مجھے بولنگ پسند ہے اور میں کوچ کے دیے پلان پر عمل کرتا ہوں۔‘
ایک صارف نے اس جانب اشارہ کیا کہ صائم نے آج آٹھ اوورز میں 39 رنز دے کر دو اہم وکٹیں حاصل کیں۔ اگرچہ وہ بیٹنگ میں مشکلات کا شکار رہے ہیں مگر انھوں نے پچھلے 12 ٹی ٹوئنٹی میچوں میں 12 وکٹیں حاصل کی ہیں۔
ایک دوسرے صارف نے تبصرہ کیا کہ ’صائم ایوب بیٹ یا بال میں سے ایک میں تو بہتر ہی نظر آتے ہیں۔‘
دریں اثنا شائقین نے 17 سال بعد فیصل آباد میں کرکٹ کی واپسی پر خوب جشن منایا۔ براڈکاسٹرز نے بتایا کہ سٹیڈیم ہاؤس فُل رہا اور یہ میچ دیکھنے 17 ہزار فینز سٹیڈیم میں جمع ہوئے۔
بہرام نامی صارف نے لکھا کہ ’سموگ بھی شائقین کو آنے سے نہ روک سکی۔‘
خیال رہے کہ منگل کے روز فیصل آباد کے ایئر کوالٹی انڈیکس (اے کیو آئی) نے بعض علاقوں میں 700 سے بھی تجاوز کیا۔ میچ کے دوران گراؤنڈ میں دھند کے مناظر دیکھے گئے جس سے حد نگاہ کچھ حد تک متاثر ہوئی۔
کچھ صارفین پاکستانی ٹیم کی طرف سے موقع گنوانے پر بھی مایوس ہوئے۔ جیسے نسیم شاہ نے ایک نو بال پر بریٹزکے کو بولڈ کر دیا۔ جبکہ ابرار نے ایک کیچ ڈراپ کیا۔
