“لوگ کہتے ہیں کہ چونکہ میری شادی ایک عیسائی خاتون سے ہوئی ہے، اس لیے شاید میں اپنا مذہب بھول چکا ہوں، لیکن ایسا کچھ نہیں۔ میں آج بھی اسلام پر عمل کرتا ہوں، اپنے بچوں کو مسجد لے کر جاتا ہوں، وہ باقاعدگی سے قرآن پڑھتے ہیں، اور میری اہلیہ بھی اپنے مذہب کی پیروی کرتی ہیں۔”
پاکستانی ڈرامہ انڈسٹری کے باصلاحیت اداکار حسن احمد ایک بار پھر خبروں میں ہیں، لیکن اس بار وجہ ان کی کوئی نئی سیریل نہیں بلکہ وہ مسلسل افواہیں ہیں جو ان کی ذاتی زندگی سے جڑی رہتی ہیں۔ ’سمتھنگ ہاٹ‘ کو دیے گئے تازہ انٹرویو میں انہوں نے اپنے کیریئر کے نشیب و فراز سے لے کر گھر پر ہونے والی بحثوں تک، سب کچھ بے جھجھک بیان کردیا۔
حسن احمد نے بتایا کہ ابتداء میں انہیں زیادہ تر منفی کردار ہی ملتے تھے، اور کئی بار ایک جیسے کردار دیکھ کر وہ تنگ آ جاتے تھے۔ وہ کئی بار ایسی آفرز رد بھی کر دیتے تھے، لیکن بعد میں سمجھ آیا کہ اصل اہمیت کردار کی لمبائی کی نہیں بلکہ اس بات کی ہے کہ اداکاری کتنے اثر کے ساتھ کی جائے۔ انہوں نے کہا کہ کم دن کام ملے یا زیادہ، اصل امتحان یہ ہے کہ اداکار اس میں اپنی پہچان چھوڑ سکے، اور یہی وہ اصول ہے جس پر وہ آج بھی قائم ہیں۔
دلچسپ بات یہ ہے کہ جن ڈراموں میں حسن احمد نے منفی کردار نبھایا، وہی سب سے زیادہ مشہور ہوئے، جبکہ مثبت کردار والی کہانیاں کم سامنے آئیں۔ ان کے مطابق شاید ناظرین منفی کرداروں کی شدت، پیچیدگی اور جذباتی موڑ زیادہ دیر تک یاد رکھتے ہیں۔
انٹرویو کا سب سے حساس حصہ وہ تھا جب انہوں نے اپنے اور اہلیہ سنیتا مارشل کے بارے میں گردش کرنے والی غیر ضروری باتوں پر آواز اٹھائی۔ 2008 میں شادی کے بعد سے آج تک یہ جوڑا مختلف مذاہب سے ہونے کی وجہ سے بارہا تنقید کا نشانہ بنا، لیکن حسن احمد نے واضح طور پر کہا کہ شادی کا تعلق ایمان سے نہیں بلکہ دو انسانوں کی باہمی سمجھ، برداشت اور محبت سے ہوتا ہے۔
انہوں نے بتایا کہ پہلے دس سال دونوں نے ایک دوسرے کو سمجھنے میں گزارے، اور کبھی کبھار ایسا لمحہ بھی آتا تھا جب دل میں علیحدگی کا خیال آتا، مگر بچوں نے ہمیشہ انہیں مضبوط رکھا۔ آج صورتحال یہ ہے کہ اگر کوئی بات تکلیف دیتی ہے یا کوئی مسئلہ کھڑا ہوتا ہے، تو وہ فوراً بیٹھ کر ایک دوسرے سے کھل کر بات کر لیتے ہیں۔
حسن احمد کی گفتگو نے ایک بار پھر یہ ثابت کیا کہ مشہور شخصیات کی زندگی باہر سے جتنی پرکشش لگتی ہے، اتنی ہی عام انسانوں کی طرح چیلنجز سے بھری بھی ہوتی ہے۔ لیکن برداشت، بات چیت اور والدین کی ذمہ داری نے اس رشتے کو وہاں پہنچا دیا ہے جہاں اختلافات کی جگہ اب سمجھداری نے لے لی ہے۔